സമരം എന്തിന്? എന്തുകൊണ്ട് അവസാനിപ്പിച്ചു?

നീതി ലഭിക്കും വരെ പോരാട്ടം തുടരുമെന്ന് സെക്രട്ടേറിയറ്റിനു മുന്നിൽ 12 ദിവസം നിരാഹാരം അനുഷ്ഠിച്ച എൽ.പി.എസ്.ടി റാങ്ക് ഹോൾഡേഴ്സ് അസോസിയേഷൻ സെക്രട്ടറി വളർമതി പറയുന്നു

-------------------------------------------

എൽ.പി.എസ്.ടി റാങ്ക് ഹോൾഡർമാരായ ഞങ്ങൾ സമരം ചെയ്തത് ആരോടും വ്യക്തിപരമായ വിരോധം കൊണ്ടല്ല. ഒരു ജോലി ലഭിക്കണം എന്ന ആഗ്രഹം മാത്രമല്ല ഞങ്ങളെ സെക്രട്ടേറിയറ്റിന്റെ മുന്നിലേക്ക് എത്തിച്ചത്. അർഹത നേടിയിട്ടും നിയമനം ലഭിക്കാതെ കാത്തുനിൽക്കുന്ന ഉദ്യോഗാർത്ഥികളുടെ നീതിക്കു വേണ്ടിയായിരുന്നു ഞങ്ങളുടെ പോരാട്ടം.

പി.എസ്.സി പരീക്ഷ എഴുതി, റാങ്ക് ലിസ്റ്റിൽ ഇടം നേടി, നിയമനം പ്രതീക്ഷിച്ച് വർഷങ്ങളോളം കാത്തിരുന്നവരാണ് ഞങ്ങൾ. ഒഴിവുകൾ ഉണ്ടായിട്ടും അവ യഥാസമയം റിപ്പോർട്ട് ചെയ്യപ്പെടാത്തതും, സർക്കാർ സ്‌കൂളുകളിലെ നിയമന സാധ്യതകൾ കുറയുന്നതും ഞങ്ങളുടെ പ്രതീക്ഷകളെ തകർത്തു.അതുകൊണ്ടാണ് ഒഴിവുകൾ റിപ്പോർട്ട് ചെയ്യുക, അർഹരായവർക്ക് നിയമനം നൽകുക, പൊതുവിദ്യാഭ്യാസ മേഖലയെ സംരക്ഷിക്കുക എന്നീ ആവശ്യങ്ങളുമായി ഞങ്ങൾ സമരത്തിനിറങ്ങിയത്.

ആദ്യം അനിശ്ചിതകാല സമരമായിരുന്നു. പിന്നീട് ആവശ്യങ്ങൾക്ക് പരിഹാരം കാണാത്ത സാഹചര്യത്തിൽ സമരം കൂടുതൽ ശക്തമാക്കേണ്ടിവന്നു. ഒടുവിൽ 12 ദിവസം നിരാഹാര സമരത്തിൽ ഇരിക്കേണ്ട സാഹചര്യം വന്നു.

12 ദിവസത്തെ നിരാഹാരം

മറക്കാനാകാത്ത അനുഭവം

ആ 12 ദിവസങ്ങൾ ശരീരത്തിനും മനസ്സിനും ഒരുപോലെ വലിയ പരീക്ഷണമായിരുന്നു.ആദ്യ ദിവസങ്ങളിൽ തന്നെ ശരീരത്തിൽ ക്ഷീണം അനുഭവപ്പെട്ടു. ദിവസങ്ങൾ കടന്നപോകുന്തോറും സാധാരണ കാര്യങ്ങൾ പോലും ബുദ്ധിമുട്ടായി തോന്നി. എന്നാൽ ഞങ്ങളുടെ ആവശ്യങ്ങൾ മുന്നിൽ നിൽക്കുമ്പോൾ ആ വേദനയെക്കാൾ വലുതായി തോന്നിയത് നീതിക്കായുള്ള പ്രതീക്ഷയായിരുന്നു.നിരാഹാര സമരപ്പന്തലിൽ ഞങ്ങൾ ഒറ്റയ്ക്കായിരുന്നില്ല. ഞങ്ങളെ കാണാനെത്തിയ വിവിധ റാങ്ക് ലിസ്റ്റിൽപ്പെട്ട ഉദ്യോഗാർത്ഥികൾ, അദ്ധ്യാപകർ, രക്ഷിതാക്കൾ, പൊതുപ്രവർത്തകർ, സുഹൃത്തുക്കൾ—ഓരോരുത്തരുടെയും പിന്തുണ ഞങ്ങൾക്ക് വലിയ ഊർജമായി.

ചില ദിവസങ്ങളിൽ ശരീരം തളർന്നപ്പോഴും, 'നിങ്ങളുടെ പോരാട്ടം ശരിയാണ്, നിങ്ങൾ ഒറ്റയ്ക്കല്ല' എന്നൊരു വാക്ക് പോലും വീണ്ടും ശക്തി നൽകി.12 ദിവസത്തെ നിരാഹാരം ഞങ്ങളെ ഒരു കാര്യം കൂടി പഠിപ്പിച്ചു:ഒരു ജോലി നേടാനുള്ള പോരാട്ടം മാത്രമല്ല ഇത്; അർഹതയ്ക്കും നീതിക്കും വേണ്ടിയുള്ള പോരാട്ടമാണ്.

പിന്നെ എന്തുകൊണ്ട് സമരം അവസാനിപ്പിച്ചു?

സമരം അവസാനിപ്പിച്ചത് ഞങ്ങളുടെ ആവശ്യങ്ങൾ ഉപേക്ഷിച്ചതുകൊണ്ടല്ല. നിരാഹാരം അവസാനിപ്പിച്ചതുകൊണ്ട് പോരാട്ടവും അവസാനിക്കുന്നില്ല. ആവശ്യങ്ങൾ പരിഗണിക്കപ്പെട്ടു.നടപ്പിലാക്കാൻ കാത്തിരിക്കുന്നു.12 ദിവസത്തെ നിരാഹാരം ഞങ്ങളുടെ പരാജയമല്ല. ഞങ്ങൾ ഉയർത്തിയ ആവശ്യങ്ങൾ സമൂഹത്തിന്റെയും അധികാരികളുടെയും മുന്നിലെത്തിച്ച ശക്തമായ ഒരു അദ്ധ്യായമാണ്.12 ദിവസത്തെ നിരാഹാരം അവസാനിച്ചേക്കാം.പക്ഷേ നീതിക്കായുള്ള പോരാട്ടം അവസാനിച്ചിട്ടില്ല.പോരാടും…നീതി ലഭിക്കും വരെ പോരാടും.