വഴക്കിനെ തുടർന്ന് യുവാവിന് കുത്തേറ്റു

അന്തിക്കാട്: കണ്ടശ്ശാംകടവ് മാമ്പുള്ളിയിൽ വഴക്കിനെ തുടർന്ന് യുവാവിനെ കുത്തി പരിക്കേൽപ്പിച്ചു. അരിമ്പൂർ സ്വദേശി ദേവരാഗം വീട്ടിൽ ശ്യാംകുമാറിനാണ് (42) വയറ്റിൽ കുത്തേറ്റത്. അന്തിക്കാട് മദ്യശാലയിലെ ജീവനക്കാരനായ ഇയാളെ വാടാനപ്പള്ളി ആക്ട്‌സ് പ്രവർത്തകർ തൃശൂർ മദർ ആശുപത്രിയിൽ പ്രവേശിപ്പിച്ചു. ഞായറാഴ്ച രാവിലെ 9:45 ഓടെയായിരുന്നു സംഭവം. മാമ്പുള്ളിയിലെ ഒരു സഞ്ചയന ചടങ്ങിനെത്തിയ ശ്യാംകുമാറും അവിടെ താമസിക്കുന്ന എടക്കാട്ട് വീട്ടിൽ സിലേഷും (47) തമ്മിൽ വാക്കേറ്റമുണ്ടാവുകയും, ഇത് അക്രമത്തിൽ കലാശിക്കുകയുമായിരുന്നു. അക്രമം നടത്തിയ സിലേഷിനെ അന്തിക്കാട് പൊലീസ് അറസ്റ്റ് ചെയ്തു.