ഭർത്താവ് പിന്നിലേക്കെടുത്ത കാർ ഇടിച്ച് മുൻ പ്രധാനാദ്ധ്യാപിക മരിച്ചു, സംഭവത്തിന്റെ സിസിടിവി ദൃശ്യങ്ങൾ പുറത്ത്

കോട്ടയം: ഭർത്താവ് ഓടിച്ച കാർ പിന്നിലേക്ക് വന്നിടിച്ച് ഭാര്യ മരിച്ചു. കോട്ടയം കിടങ്ങൂർ സൗത്ത് ക്ഷേത്രത്തിന് സമീപം താമസിക്കുന്ന പട്ടേലിൽ ശോഭന കുമാരി (66)യാണ് മരിച്ചത്. ശോഭന കുമാരിയും ഭർത്താവ് മുരളീധരൻ പിള്ളയും പുറത്തുപോയി വന്നശേഷം കാർ തിരികെ ഭർത്താവ് ഷെഡിലേക്ക് കയറ്റുമ്പോഴാണ് അപകടമുണ്ടായത്. കിടങ്ങൂർ ഭാരതീയ വിദ്യാമന്ദിരം സ്‌കൂൾ റിട്ടയേർഡ് ഹെഡ്‌മിസ്‌ട്രസാണ് ശോഭന കുമാരി.

വെള്ളിയാഴ്‌ച ഉച്ചയ്‌ക്ക് ഒന്നരയോടെയാണ് സംഭവം. മുരളീധരൻ പിള്ള കാർ റിവേഴ്‌സ് എടുക്കുന്നതിനിടെ നിയന്ത്രണം നഷ്‌ടമായി ശോഭന കുമാരിയെ ഇടിച്ചുവീഴ്‌ത്തുകയായിരുന്നു. സംഭവമറിഞ്ഞെത്തിയ നാട്ടുകാർ ഉടനെ ശോഭന കുമാരിയെ ആശുപത്രിയിലെത്തിച്ചെങ്കിലും മരിച്ചു.