ദാമ്പത്യപ്രശ്നം പരിഹരിക്കാൻ എത്തിയ യുവതിയെ പീഡിപ്പിച്ചു: വ്യാജ സിദ്ധൻ അറസ്റ്റിൽ

കോഴിക്കോട്: താമരശേരിയിൽ യുവതിയെ ലൈംഗികമായി പീഡിപ്പിച്ച വ്യാജ സിദ്ധൻ അറസ്റ്റിൽ. പുതുപ്പാടി ആലഞ്ചേരി കളത്തിൽ അൻവർ‌ സാദത്താണ് അറസ്റ്റിലായത്. ദാമ്പത്യപ്രശ്നം പരിഹരിക്കാൻ ഭർത്താവിനൊപ്പം എത്തിയപ്പോഴായിരുന്നു പീഡനം നടന്നതെന്നാണ് പരാതി.

ചില ദാമ്പത്യപ്രശ്നങ്ങൾ പരിഹരിക്കുന്നതിനാണ് ഭർത്താവിനൊപ്പം യുവതി അൻവർ സാദത്തിന്റെ അടുത്തെത്തിയത്. തുടർന്ന് പ്രശ്നപരിഹാരം എന്നുപറഞ്ഞ് ഭർത്താവിന്റെ കയ്യിൽ മന്ത്രം ജപിച്ച് ഒരു തേങ്ങ നൽകിയ ശേഷം പുറത്തേക്ക് നോക്കി ആ മന്ത്രം ചൊല്ലാൻ പ്രതി ആവശ്യപ്പെടുകയായിരുന്നു.

ഭർത്താവ് മന്ത്രം ചൊല്ലുന്നതിനിടയിൽ യുവതിയെ മറ്റൊരു മുറിയിലേയ്ക്ക് കൊണ്ടുപോയി ലൈംഗികമായി പീഡിപ്പിക്കുകയായിരുന്നുവെന്നാണ് പരാതി. സംഭവത്തിന് പിന്നാലെ ഒളിവിൽപോയ അൻവ‌ർ സാദത്ത് കഴിഞ്ഞ ദിവസം വീട്ടിലെത്തിയപ്പോഴാണ് പൊലീസിന്റെ പിടിയിലായത്. ഇയാൾ പോക്സോ കേസിലും പ്രതിയാണെന്ന് പൊലീസ് പറഞ്ഞു.