'ഇല"ത്താളം മുറുകുന്നു; നാക്കിലയിൽ ഓണമുണ്ണാം

കൊച്ചി: പടിക്കലെത്തിയ പൊന്നോണത്തെ ചിട്ടവട്ടങ്ങളോടെ വരവേൽക്കാൻ കലവറകളിൽ 'ഇല"ത്താളം മുറുകുന്നു. കാറ്ററിംഗ് യൂണിറ്റുകളിൽ പുതുമകളുടെ പൂക്കാലം. നാലുകൂട്ടം ഉപ്പേരിയും രണ്ട് അച്ചാറും രണ്ട് പ്രഥമനും ഉൾപ്പെടുന്ന ഇടത്തരം സദ്യ മുതൽ 3-4 പായസവും ബോളിയുമുള്ള മെഗാ സദ്യയുമുണ്ടാകും. 'ഉണ്ടോണം" ഗംഭീരമായി എന്ന് സകലരെക്കൊണ്ടും പറയിച്ചേ അടങ്ങൂ എന്ന വാശിയിലാണ് കാറ്ററിംഗുകാർ. പോക്കറ്റിനും വയറിന്റെ ശേഷിക്കും യോജിച്ച പാക്കേജുകൾ തിരഞ്ഞെടുക്കാം.
രുചിക്കൂട്ടുകളുടെ തലസ്ഥാനമെന്നു വിശേഷിപ്പിക്കാവുന്ന കൊച്ചിയിൽ പതിവുപോലെ സദ്യ പൊടിപൂരമാകും.

400 രൂപ മുതൽ

24 വിഭവങ്ങളടങ്ങിയ,​ ഇലയടക്കമുള്ള സദ്യയ്ക്ക് ഒരാൾക്ക് 400 രൂപയാണ് നിരക്ക്. പാലടയും പരിപ്പ് പ്രഥമനുമുണ്ടാകും. കുറേക്കൂടി വിശാലമാക്കണമെങ്കിൽ 520 ന്റെ സദ്യയാവാം. അച്ചാറുകളടക്കം 26 വിഭവങ്ങളും പാലട, പരിപ്പ് പ്രഥമൻ, പഴപ്രഥമൻ എന്നിവയുമുണ്ടാകും. ചില കാറ്ററിംഗുകാർ പഴപ്രഥമന് അകമ്പടിയായി ബോളിയും ഉൾപ്പെടുത്തിയിട്ടുണ്ട്.

 അഞ്ചു പേർക്ക് 2000

ചോറൊഴികെ അഞ്ചുപേർക്കുള്ള 2000 രൂപയുടെ പാക്കേജുമുണ്ട്. ചോറിന്റെ കാര്യത്തിൽ അഭിരുചികൾ പലതായതാണ് പ്രശ്‌നം. ചിലർക്ക് ചുവന്ന ചോറാണെങ്കിൽ മറ്റുചിലർക്ക് വലിയ അരിയായ ജയയുടെ ചോറാണിഷ്ടം. ഈ സദ്യയിൽ സാമ്പാർ, രസം, തൈര്, കാളൻ, അവിയൽ, തോരൻ, പച്ചടി, മാങ്ങാക്കറി, നാരങ്ങാക്കറി, പുളയിഞ്ചി, പഴം, നാലുകൂട്ടം ഉപ്പേരി, മുളക് കൊണ്ടാട്ടം, രണ്ട് പായസം എന്നിവയുണ്ട്. പായസം മാത്രമായും വാങ്ങാം.

 വിലയിൽ മാറ്റമില്ല

പച്ചക്കറിക്കും പലവ്യഞ്ജനങ്ങൾക്കും വിലകൂടിയിട്ടും ഓണസദ്യക്ക് കാര്യമായ വർദ്ധന വരുത്തിയിട്ടില്ലെന്ന് കാറ്ററിംഗുകാർ പറയുന്നു. കഴിഞ്ഞതവണത്തേക്കാൾ ബുക്കിംഗ് കൂടുന്നുണ്ട്. തിരക്ക് കൂടിയതിനാൽ വ്യാഴാഴ്ചയോടെ ബുക്കിംഗ് അവസാനിപ്പിക്കാനാണ് സാദ്ധ്യത. ഡി​മാൻഡ് ഏറി​യതി​നാൽ പ്രമുഖ കേറ്ററിംഗ് സ്ഥാപനങ്ങൾ ദി​വസങ്ങൾക്ക് മുമ്പേ സദ്യ ബുക്കിംഗ് നി​റുത്തി​. വയനാട് ദുരന്തത്തെ തുടർന്ന് സർക്കാർ ഓണാഘോഷങ്ങൾ ഇല്ലാതി​രുന്നി​ട്ടും ഓർഡറുകൾക്ക് ഒരു കുറവുമി​ല്ല. 12, 13 തീയതി​കളി​ലാണ് ഓഫീസുകളി​ലും മറ്റും ഓണാഘോഷം നടക്കുക .

പായസം വില

(ലിറ്ററിന് ഏകദേശം)

• പഴപ്രഥമൻ 315

• പാലട 294

• ഗോതമ്പ് പായസം 273

• പരിപ്പ് പ്രഥമൻ 273

ഇക്കുറി​ ഓണസദ്യയ്ക്ക് വലി​യ ഡി​മാൻഡാണ്. 15 ദി​വസം മുമ്പ് ബുക്കിംഗ് നി​റുത്തി​. അന്വേഷണങ്ങൾ തുടരെ വരുന്നുണ്ട്.

എ.എസ്.മഹാദേവ അയ്യർ

വി​നായക കേറ്ററേഴ്സ്