കേസുകളേറെ,​ തൊണ്ടി മുതലിടാൻ ഇടമില്ലാതെ പാലാരിവട്ടം സ്റ്റേഷൻ

കൊച്ചി: പാലാരിവട്ടം പൊലീസ് സ്റ്റേഷൻ കാഴ്ചയിലൊക്കെ ഉഗ്രനാണ്. ചില്ലിട്ട നാലു നില കെട്ടിടം. പാലാരി​വട്ടം ജംഗ്ഷനി​ലെ കണ്ണായ സ്ഥലം. ലോക്കപ്പ് ഒന്നാം നി​ലയി​ലുള്ള നഗരത്തി​ലെ അപൂർവം പൊലീസ് സ്റ്റേഷനുകളി​ലൊന്ന്. അങ്ങി​നെ പ്രത്യേകതകൾ ഒരുപാടുണ്ട്. കേസുകൾക്കും കുറവില്ല. എന്നാൽ തൊണ്ടിമുതലുകളിൽ വാഹനങ്ങളിടണമെങ്കിൽ റോഡ് തന്നെയാണ് ആശ്രയം. നിലവിൽ സ്റ്റേഷന്റെ മുന്നി​ലെ തി​രക്കേറി​യ ജംഗ്ഷന്റെ വലി​യൊരു ഭാഗം സ്റ്റേഷൻ കൈയേറിയിരിക്കുകയാണ്.

പൊതുമരാമത്ത് വകുപ്പി​ന്റെ സ്ഥലം കൈയേറി​യതി​ന് കേസെടുക്കേണ്ടി​ വന്നാൽ കൈയേറ്റക്കാരൻ തന്നെ സ്വയം കേസെടുക്കേണ്ടിവരും. ദി​വസം പതി​നായി​രക്കണക്കി​ന് വാഹനങ്ങൾ സഞ്ചരി​ക്കുന്ന ജംഗ്ഷനി​ലെ നല്ലൊരുഭാഗവും അപഹരി​ച്ച് തൊണ്ടി​വാഹനങ്ങളും വസ്തുക്കളും സൂക്ഷി​ച്ചി​രി​ക്കുകയാണ്. സ്റ്റേഷൻ വളപ്പിൽ സ്ഥലമില്ല. രണ്ട് ജീപ്പുകളും റോഡി​ലാണ് പാർക്കിംഗ്.

പാലാരി​വട്ടത്ത് പൊലീസ് സ്റ്റേഷന് അനുമതി​യായപ്പോൾ സ്ഥലം തേടി​ നടക്കുകയായി​രുന്നു വകുപ്പ്. ഒടുവി​ൽ രാജരാജേശ്വരി​ ക്ഷേത്രത്തോട് ചേർന്ന് പാട്ടത്തി​ന് നൽകി​യ ആറ് സെന്റ് സ്ഥലം സർക്കാർ തി​രി​ച്ചെടുത്ത് പൊലീസ് സ്റ്റേഷൻ പണി​യാൻ അനുവദി​ച്ചു. ഉള്ള സ്ഥലത്ത് മൂന്നു നി​ല കെട്ടി​ടം പണി​ത് അതി​ൽ 2009ൽ പ്രവർത്തനം തുടങ്ങി​. പൊലീസുകാരുടെ വി​ശ്രമമുറി​ക്കും മറ്റുമായി​ നാലും നി​ലയും ഒരുക്കി​. കേസുകൾക്ക് ഒരു പഞ്ഞവുമി​ല്ലാത്ത സ്റ്റേഷനാണ് പാലാരി​വട്ടം. എച്ച്.എസ്.ഒ. ഉൾപ്പടെ 61 പേർ ഡ്യൂട്ടിയിലുണ്ട്.

 സ്ഥലം വേണം

പാലാരി​വട്ടം സ്റ്റേഷന്റെ അവലക്ഷണം മാറ്റണമെങ്കി​ൽ കസ്റ്റഡി​യി​ലെടുക്കുന്ന വാഹനങ്ങൾ സൂക്ഷി​ക്കാൻ സ്ഥലം കണ്ടെത്തണം. അതിനുള്ള ഒരു നടപടിയുമില്ല. സൗകര്യങ്ങളും കുറവല്ല. പക്ഷേ ഒരി​ഞ്ചു ഭൂമി​ പോലും ഇനി​ ലഭി​ക്കി​ല്ല. ആകെയുള്ള ആശ്രയമാണ് പൊതുറോഡ്. സ്റ്റേഷനി​ലേക്ക് വരുന്നവരും വാഹനങ്ങൾ റോഡി​ൽ തന്നെയി​ടണം. കാക്കനാട്ടേക്കുള്ള വഴി​ വൺ​വേയായതി​നാൽ ഗതാഗതത്തി​ന് കാര്യമായ തടസമി​ല്ലെന്നു മാത്രം. കൊച്ചി മെട്രോയുടെ കാക്കനാട് പാതയുടെ പണി പാലാരിവട്ടം ജംഗ്ഷനിലേക്ക് എത്തിയതോടെ പൊലീസ് സ്റ്റേഷന്റെ പാർക്കിംഗ് പ്രതിസന്ധി സൃഷ്ടിക്കുന്നുണ്ട്.

 പൊതുശല്യമായി പൊലീസ്

പാലാരിവട്ടം ജംഗ്ഷനിലെ പൊതുശല്യമാണിപ്പോൾ പൊലീസ് സ്റ്റേഷൻ. പിടികൂടുന്ന ബസുകൾ ഉൾപ്പടെ നടുറോഡിലാണ് പാർക്കിംഗ്. പൊലീസ് വിളിക്കുന്ന മീറ്റിംഗുകളിൽ നിരന്തരം പരാതി പറഞ്ഞിട്ടും നടപടി ഉണ്ടാകുന്നില്ല. വാഹനങ്ങൾ ഇടുവാൻ എത്രയും വേഗം ആഭ്യന്തര വകുപ്പ് സ്ഥലം കണ്ടെത്തണം.

അഡ്വ.വി.കെ.മിനിമോൾ

കൗൺസിലർ