ഒറ്റ കോൾ മതി​, വളർത്തു മൃഗങ്ങളുടെ സുരക്ഷ ഓക്കെ!

കൊല്ലം: വളർത്തുമൃഗങ്ങളുടെ ചികിത്സയ്ക്ക് ആധുനിക സാങ്കേതിക സൗകര്യങ്ങളോടെ പുറത്തിറക്കിയ മൊബൈൽ ടെലിവെറ്ററിനറി യൂണിറ്റ്
കൊല്ലം ജില്ലാ വെറ്ററിനറി കേന്ദ്രത്തിൽ പ്രവർത്തന സജ്ജമായി. ടോൾ ഫ്രീ നമ്പറായ 1962ൽ വി​ളി​ച്ചാൽ മൃഗസുരക്ഷ വീട്ടുമുറ്റത്തെത്തും.

വീണുപോയ മൃഗങ്ങളെ ഉയർത്താനുള്ള ലിഫ്റ്റിംഗ് മെഷീൻ, പോർട്ടബിൾ എക്സ്റേ, അൾട്രാ സൗണ്ട് സ്കാനിംഗ്, ജീവൻ രക്ഷാമരുന്നുകൾ,
ശസ്ത്രക്രിയ സൗകര്യങ്ങൾ എന്നിവയുൾപ്പെടെ സജ്ജീകരിച്ചിരിക്കുന്ന ആംബുലൻസ് അടിയന്തിര സർവീസിനായി രംഗത്തെത്തും

രാവിലെ 8 മുതൽ രാത്രി 8 വരെയാണ് ടെലിവെറ്ററിനറി സർവ്വീസിന്റെ സേവനം. 2 വെറ്ററിനറി സർജൻമാർ, 2 അനിമൽ ഹാൻഡ്ലേഴ്സ്
ഉൾപ്പെടെയുള്ള യൂണിറ്റ് രണ്ടു ഷിഫ്റ്റുകളായാണ് പ്രവർത്തിക്കുന്നത്. ആംബുലൻസിന്റെ ഫ്ളാഗ് ഓഫ് മൃഗസംരക്ഷണ അഡീഷണൽ ഡയറക്ടർ
ഡോ.കെ.സിന്ധു നിർവ്വഹിച്ചു. ജില്ലാ മൃഗാശുപത്രി മേധാവി ഡോ.ഡി. ഷൈൻകുമാർ, സീനിയർ വെറ്ററിനറി സർജൻമാരായ ഡോ. സുനു, ഡോ. ബി. സോജ എന്നിവർ സംസാരിച്ചു