കെ.എസ്.ആർ.ടി.സി 'പുസ്തകക്കൂട്' ഉദ്ഘാടനം

കൊല്ലം: കെ.എസ്.ആർ.ടി.സി ജീവനക്കാരുടെയും സുഹൃത്തുക്കളുടെയും സാംസ്കാരിക സംഘടനയായ 'വായനശാല' പുസ്തകക്കൂടുകളുടെ സംസ്ഥാനതല ഉദ്ഘാടനം ഇന്ന് രാവിലെ 10.30ന് കണ്ണൂർ കെ.എസ്.ആർ.ടി.സി ഡിപ്പോയിൽ മന്ത്രി കടന്നപ്പള്ളി രാമചന്ദ്രൻ നിർവഹിക്കും. കണ്ണൂർ ജില്ലാ ട്രാൻസ്‌പോർട്ട് ഓഫീസർ വി. മനോജ് കുമാർ അദ്ധ്യക്ഷനാവും. കഥാകൃത്ത് ഡോ. അംബികാസുതൻ മാങ്ങാട് മുഖ്യാതിഥിയാകും. 'ആളൊഴിഞ്ഞ മൂലയിലല്ല നാലാളു കൂടുന്നിടത്താണ് പുസ്തകങ്ങളുടെ സ്ഥാനം' എന്ന പ്രഖ്യാപനവുമായി വായനശാല നടപ്പാക്കുന്ന ഏറ്റവും പുതിയ സംരംഭമാണ് പുസ്തകക്കൂട്. ബസ് കാത്തിരിക്കുന്ന സമയം യാത്രക്കാർ വായനയ്ക്കായി പ്രയോജനപ്പെടുത്തുക എന്ന ലക്ഷ്യത്തോടെയാണ് ബസ് സ്റ്റാൻഡുകളിൽ പുസ്തകക്കൂടുകൾ സ്ഥാപിക്കുന്നത്. ജീവനക്കാരുടെയും കുടുംബാംഗങ്ങളുടെയും കൂട്ടായ്മയായ വായനശാല, ഇതിനോടകം നിരവധി സാംസ്‌കാരിക-സാഹിത്യ പ്രവർത്തനങ്ങളിലൂടെ ശ്രദ്ധേയമാണ്. വായനയെ യാത്രക്കാരിലേക്ക് കൂടി എത്തിക്കുക എന്ന ലക്ഷ്യമാണ് പുതിയ സംരംഭത്തിന് പിന്നിൽ.