ബിസിനസിൽ 4 പതിറ്റാണ്ട് പാരമ്പര്യം: എ.ഐ യുഗത്തിലും പോച്ചയിൽ നാസറിന് ഫോണില്ല

കൊല്ലം: ജില്ലയിൽ അറിയപ്പെടുന്ന നാൽപ്പതിൽ അധികം വർഷത്തെ പാരമ്പര്യമുള്ള ബിസിനസ് സ്ഥാപനമായ പോച്ചയിൽ ഗോൾഡ് ആൻഡ് ഡയമൻഡ്സ്, പോച്ചയിൽ ഹോം ഷോപ്പി സംരഭങ്ങളുടെ ചെയർമാനും പൊതു-സാമൂഹിക രംഗത്തും ജീവകാരുണ്യ പ്രവർത്തനങ്ങളിലും സജീവ സാന്നിദ്ധ്യമായ പോച്ചയിൽ നാസർ എ.ഐയും സ്മാർട്ട്‌ഫോണും നിറഞ്ഞ കാലഘട്ടത്തിലും അപൂർവ ജീവിതശൈലിയാണ് പിന്തുടരുന്നത്.

അദ്ദേഹം ഇതുവരെ ഒരു സ്മാർട്ട് ഫോൺ പോയിട്ട് ഒരു സാധാ മൊബൈൽ ഫോൺ പോലും ഉപയോഗിച്ചിട്ടില്ല. ആധുനിക ലോകത്ത് ബിസിനസ് സംരംഭം നിയന്ത്രിക്കാൻ ഏറ്റവും പ്രധാന ഉപകരണമെന്ന് കരുതപ്പെടുന്നത് സ്മാർട്ട് ഫോണും ഡിജിറ്റൽ കണക്ടിവിറ്റിയുമാണ്. എന്നാൽ എല്ലാ പ്രവണതകൾക്കും വിപരീതമായി, പോച്ചയിൽ നാസർ തന്റെ സ്ഥാപനത്തിന്റെ പ്രവർത്തനങ്ങളെ നേരിട്ടുള്ള മാനേജ്മെന്റിലൂടെയും ജീവനക്കാരുമായുള്ള വ്യക്തിഗത ബന്ധങ്ങളിലൂടെയും നിയന്ത്രിച്ചാണ് മുന്നോട്ട് കൊണ്ടുപോകുന്നത്.

അത്ഭുതകരമായ കാര്യക്ഷമതയോടെ പ്രവർത്തിക്കുന്ന അദ്ദേഹത്തിന്റെ നേതൃത്വ ശൈലി പലർക്കും കൗതുകവും അതിശയവും ഉണർത്തുന്നു. സാങ്കേതിക സൗകര്യങ്ങളിലല്ല, മനുഷ്യബന്ധങ്ങളുടെ ശക്തിയിലൂടെയാണ് തന്റെ പ്രവർത്തന ലോകം നിർമ്മിച്ചിരിക്കുന്നത്. നേരിട്ട് സംസാരിക്കുന്നതും നേരിൽ കാണുന്നതുമാണ് ഏറ്റവും ശക്തമായ ആശയവിനിമയം എന്ന സമീപനമാണ് അദ്ദേഹത്തിന്റെ പ്രവർത്തന ശൈലിയെ നയിക്കുന്നതെന്ന് സഹപ്രവർത്തകർ പറയുന്നു.

വേറിട്ട മാതൃക

ബിസിനസ് മേഖലയിലെ പലരും ഡിജിറ്റൽ സംവിധാനങ്ങളിൽ ആശ്രയിക്കുമ്പോൾ, പോച്ചയിൽ നാസർ തന്റെ വ്യത്യസ്ത നിലപാടിലൂടെ വേറിട്ട മാതൃക സൃഷ്ടിക്കുകയാണ്. ഫോൺ ഇല്ലാതെയും വലിയൊരു ബിസിനസ് സംരംഭം വിജയകരമായി നിയന്ത്രിക്കാമെന്നതിന് അദ്ദേഹം തന്നെ ഉദാഹരണമാണ്. സാങ്കേതിക യുഗത്തിന്റെ അതിവേഗ മാറ്റങ്ങൾക്കിടയിലും, തന്റെ നിലപാടിൽ ഉറച്ചുനിന്ന് ബിസിനസും സാമൂഹിക പ്രവർത്തനങ്ങളും ഒരുപോലെ മുന്നോട്ട് കൊണ്ടുപോകുന്ന പോച്ചയിൽ നാസർ, ഇന്നത്തെ തലമുറയ്ക്ക് വ്യത്യസ്ത ചിന്താവിഷയമാണ്.