ഉദയനാപുരം വില്ലേജ് ഓഫീസ് സ്മാർട്ടാകും

വൈക്കം : വർഷങ്ങളായി വാടകക്കെട്ടിടത്തിൽ പ്രവർത്തിക്കുന്ന ഉദയനാപുരം വില്ലേജ് ഓഫീസിന് സ്വന്തമായി കെട്ടിടം നിർമ്മിച്ച് സ്മാർട്ടാക്കുന്നതിനായി സർക്കാർ 45 ലക്ഷം രൂപ അനുവദിച്ചു. വില്ലേജ് ഓഫീസ് വാടകക്കെട്ടിടത്തിന്റെ മുകളിലത്തെ നിലയിൽ പ്രവർത്തിക്കുന്നതിനാൽ പ്രായമായവർക്ക് ബുദ്ധിമുട്ടാണെന്ന് ചൂണ്ടിക്കാട്ടി അഖിലേന്ത്യാ കിസ്സാൻ സഭ ഉദയനാപുരം ഈസ്​റ്റ് മേഖലാ കമ്മ​റ്റി മന്ത്രി കെ.രാജന് നിവേദനം നൽകിയിരുന്നു. സൗകര്യപ്രദമായ സ്ഥലം കണ്ടെത്തി എത്രയും വേഗം നിർമ്മാണം പൂർത്തിയാക്കണമെന്ന് കിസ്സാൻ സഭ മണ്ഡലം സെക്രട്ടറി കെ.എം.മുരളീധരൻ ആവശ്യപ്പെട്ടു.