ക്യാപ്റ്റൻ അമേരിക്ക മുതൽ ബാറ്റ്മാൻ വരെ: ഫ്രാൻസ് പ്രതിഷേധത്തിൽ അവഞ്ചേഴ്‌സും, ഒപ്പം നെപ്പോളിയനും

പാരീസ്: ഫ്രാൻസിൽ ജീവിതച്ചെലവ് കുത്തനെ ഉയരുന്നതിനെതിരെ രാജ്യവ്യാപകമായി നടക്കുന്ന പ്രതിഷേധങ്ങളിൽ സജീവമായി അവഞ്ചേഴ്സും. കോമിക് പുസ്തകങ്ങളിലെയും സിനിമകളിലെയും സൂപ്പർ ഹീറോകളുടെ വേഷമണിഞ്ഞുമാണ് പ്രതിഷേധക്കാർ ഇറങ്ങിയിരിക്കുന്നത്. ഇതിന്റെ ചിത്രങ്ങളും വീഡിയോകളും പ്രചരിച്ചതോടെ ഫ്രാൻസിലെ പ്രക്ഷോഭമേഖലകൾ ഒരു ഹോളിവുഡ് സിനിമാ ലൊക്കേഷൻ പോലെയായെന്ന് സോഷ്യൽ മീഡിയ ഉപയോക്താക്കൾ കുറിച്ചു.

ക്യാപ്റ്റൻ അമേരിക്ക, സ്‌പൈഡർമാൻ, ബാറ്റ്‌മാൻ, ഡെഡ്പൂൾ, സൂപ്പർമാൻ തുടങ്ങിയ പ്രിയപ്പെട്ട കഥാപാത്രങ്ങളുടെ വേഷങ്ങളിലാണ് പ്രതിഷേധക്കാർ എത്തിയത്. പ്രതിഷേധത്തിനിടെ മാഴ്സെയിൽ നിന്നുള്ള ഒരു ദൃശ്യമാണ് ഇപ്പോൾ സോഷ്യൽ മീഡിയയിൽ ഏറ്റവും കൂടുതൽ വൈറലാകുന്നത്. ക്യാപ്‌റ്റൻ അമേരിക്കയുടെ വേഷം ധരിച്ച ഒരു പ്രതിഷേധക്കാരൻ തന്റെ കയ്യിലുള്ള ഷീൽഡ് ഉപയോഗിച്ച് പൊലീസിന്റെ ജലപീരങ്കിയെ പ്രതിരോധിക്കുന്നത് വീഡിയോയിൽ കാണാം. സിനിമകളിലെ ആക്ഷൻ രംഗങ്ങളെ അനുസ്മരിപ്പിക്കുന്നതായിരുന്നു ഈ കാഴ്ച.

പാരീസ് തെരുവുകളിലെ സ്‌പൈഡർ‌മാന്റെയും ബോർഡോയിൽ ബാറ്റ്‌മാന്റെയും വേഷം ധരിച്ച ആളുകളും പ്രതിഷേധത്തിന്റെ ഭാഗമായി. അവർക്ക് പുറമെ ഡെഡ്‌പൂൾ, ഒബി-വാൺ കെനോബി, ഫ്രഞ്ച് ഭരണാധികാരിയായിരുന്ന നെപ്പോളിയന്റെ വേഷമണിഞ്ഞ വ്യക്തിയും തെരുവിൽ പ്രത്യക്ഷപ്പെട്ടു. ഇവർ ഏതെങ്കിലും സംഘടനയുടെ ഭാഗമായി ആസൂത്രിതമായി വേഷം ധരിച്ച് എത്തിയതാണോ എന്ന് വ്യക്തമല്ല. പ്രതിഷേധങ്ങളുടെ കടുത്ത ആകുലതകൾക്കും പൊലീസ് നടപടികൾക്കും ഇടയിൽ ഇത്തരം വേഷങ്ങൾ വേറിട്ടൊരു കാഴ്ചയാണെന്നാണ് സോഷ്യൽ മീഡിയ ഉപയോക്താക്കൾ പറയുന്നത്.

അതേസമയം, വിദ്യാർത്ഥികളുടെ നേതൃത്വത്തിൽ തുടങ്ങിയ സമരം ഇപ്പോൾ അദ്ധ്യാപകരും യൂണിയനുകളും, യെല്ലോ വെസ്റ്റ് പ്രസ്ഥാനവും ഏറ്റെടുത്തതോടെ ഫ്രാൻസിൽ കനത്ത ആഭ്യന്തര കലാപമായി മാറിയിരിക്കുകയാണ്. ജീവിതച്ചെലവ് കുറയ്ക്കുക, പൊതുസേവനങ്ങൾ മെച്ചപ്പെടുത്തുക എന്നീ ആവശ്യങ്ങൾ ഉന്നയിച്ച് ലക്ഷക്കണക്കിന് ആളുകളാണ് രാജ്യത്തിന്റെ വിവിധ ഭാഗങ്ങളിൽ പ്രതിഷേധവുമായി രംഗത്തെത്തിയിരിക്കുന്നത്. പല ഭാഗങ്ങളിലും പ്രതിഷേധം അക്രമാസക്തമായി. കഴിഞ്ഞ ദിവസം 43 വർഷം പഴക്കമുള്ള ചരിത്രപ്രസിദ്ധമായ ലിമോസ് ടൗൺ ഹാൾ പ്രതിഷേധക്കാർ തീയിട്ട് നശിപ്പിച്ചിരുന്നു. പ്രതിഷേധം ശക്തമായ സാഹചര്യത്തിൽ പാരീസ്, നീസ്, ലിയോൺ, ലില്ലെ തുടങ്ങിയ പ്രമുഖ നഗരങ്ങളിൽ രാത്രികാല കർഫ്യൂ ഏ‌ർപ്പെടുത്തിയിട്ടുണ്ട്.