അഭിമാനത്തിന്റെ സുവർണരാവുമായി 'കല'യുടെ  മുപ്പതാം വാർഷികം

ലണ്ടൻ: സംഗീതവും നൃത്തവും നാടകവും സാഹിത്യവുമായി കലയുടെ മുപ്പതാം വാർഷികം ബെർക്ഹംപസ്റ്റഡ് സ്കൂൾ സെന്റിനറി തിയേറ്ററിൽ അരങ്ങേറി. മുഖ്യാതിഥിയായി സംഗീത സംവിധായകൻ ശരത് വേദിയിൽ നിറഞ്ഞു. കവി മധുസൂദനൻ നായർ എഴുതി ആലപിച്ച സംഗീത നാടക പരിപാടി കലയുടെ പതിവ് നിലവാരം നിലനിർത്തുന്നതായിരുന്നു.

സംഗീതനാടകം: ഓരോ വർഷവും ഏറെ മികവ് കാട്ടുന്ന കലയുടെ സംഗീതനാടകം ഇത്തവണയും മുൻനിരയിൽ തന്നെ ആയിരുന്നു. കവി മധുസൂദനൻ നായരുടെ കവിതയും സംഗീതത്തോടൊപ്പം ചേർന്നൊഴുകിയ മധുരാലാപനവും അതിന് പ്രത്യേക ഭംഗി നൽകി. കാണികളെ പൂർണമായും ആകർഷിച്ച വിസ്മയകരമായ ഒരു വേദിയനുഭവം! തമിഴ്നാട്ടിലെ കുലശേഖരത്തിനടുത്തുള്ള ഇട്ടകവേളിയിലെ 420 വർഷം പഴക്കമുള്ള കഥയിലേക്ക് സദസ്യരെ കൂട്ടിക്കൊണ്ട് പോയത് ഡോ സുകുമാരൻ നായരുടെ കലാഹൃദയം തന്നെ. അജയായിരുന്നു സംവിധാനം.


ചിരിയും ചിന്തയും പകർന്ന ഹാസ്യനാടകം: സായാഹ്നത്തിന് ചിരിയുടെ നിറം പകർന്നതിനൊപ്പം, വാക്കുകളിൽ പൂർണമായി വിവരിക്കാനാകാത്ത വിധം നമ്മെ നമ്മുടെ സ്വന്തം നാടായ കേരളത്തിലേക്ക് തിരികെ കൊണ്ടുപോയ അനുഭവമായിരുന്നു ആ അവതരണം.

അതിഥിഗായകന്റെ പ്രകടനം: മൂന്ന് ഗായകർ ചേർന്ന് അവതരിപ്പിക്കേണ്ട പാട്ട് ഒരാൾ മാത്രം ഏറ്റെടുത്ത് അത്ഭുതകരമായി പാടിയ അതിഥിഗായകന്റെ പ്രകടനം പ്രത്യേകം അഭിനന്ദിക്കണം!

മുഖാമുഖം: നർമവും സത്യസന്ധതയും ആകർഷകമായ സംഭാഷണശൈലിയും ഒത്തുചേർന്ന മുഖ്യാതിഥി സംഗീത സംവിധായകൻ ശരത്തിന്റെ സംഭാഷണവും സദസ്യരോ ടുള്ള പ്രതികരണവും അവിസ്മരണീയമായി.

ഓർക്കസ്ട്രയും ഗായകരും: അവസാനഘട്ടത്തിൽ ഓർക്കസ്ട്രയും ഗായകരും കാഴ്ചവെച്ച പ്രകടനം ആസ്വാദ്യകരമായിരുന്നു. ശരത്തിന്റെ സംഗീതസംവിധാനങ്ങൾക്കും ഗാനങ്ങൾക്കും അർഹമായ പ്രാധാന്യം ലഭിച്ചു. പാട്ടുകൾക്കൊപ്പം കൈകളും കാലുകളും താളം പിടിച്ച ആസ്വാദനനിമിഷങ്ങൾ.
ആശയുടെയും സംഘത്തിന്റെയും നൃത്താവിഷ്കാരം: ആശയും സംഘവും അവതരിപ്പിച്ച നൃത്തം കാണികളെ ഏറെ ആകർഷിച്ചു. ചുവപ്പിന്റെയും പിങ്കിന്റെയും വർണവിന്യാസം കണ്ണുകൾക്ക് വിരുന്നായി.

പരിപാടികൾക്ക് പശ്ചാത്തലമൊരുക്കിയ മനോഹരമായ ഡിജിറ്റൽ ചിത്രങ്ങളും പ്രശംസയർഹിക്കുന്നു. ഓരോ പരിപാടിയുടെയും പശ്ചാത്തലവും അന്തരീക്ഷവും അതീവ യാഥാർഥ്യബോധത്തോടെയും വ്യക്തതയോടെയും അവതരിപ്പിച്ച ആ ദൃശ്യങ്ങൾ എല്ലാവരുടെയും ഭാവനയെ ഉണർത്തി. 'കല'യുടെ പ്രസിദ്ധീകരണമായ 'പാംലീഫ്' -122 പേജുകളുള്ള ഈ മനോഹരമായ മാഗസിൻ, തയാറാക്കിയത് ഹേമയാണ്.