പ്രവാസികൾക്ക് ഇരുട്ടടി; പശ്ചിമേഷ്യൻ സംഘർഷത്തിന് പിന്നാലെ യുഎഇയിൽ ഇന്ധനവില വീണ്ടും കുത്തനെ കൂട്ടി

ദുബായ്: ഒരിടവേളയ്ക്ക് ശേഷം പശ്ചിമേഷ്യൻ സംഘർഷം ശക്തമായിതിന് പിന്നാലെ ഇന്ധനവില വ‌ർദ്ധിപ്പിച്ച് യുഎഇ. തുടർച്ചയായി രണ്ടാമത്തെ മാസമാണ് രാജ്യം പെട്രോളിന്റെയും ഡീസലിന്റെയും വില തുടർച്ചയായി ഉയർത്തുന്നത്. ഡീസൽ ലിറ്ററിന് 50 ഫിൽസാണ് (ഏകദേശം 13 രൂപ)​ വർദ്ധിപ്പിച്ചത്. ഇതോടെ ഒരു ലിറ്റർ ഡീസലിന്റെ വില 4 ദിർഹം 30 ഫിൽസായി (ഏകദേശം 112 രൂപ)​ ഉയർന്നു.

അമേരിക്ക-ഇറാൻ സംഘർഷം വീണ്ടും ശക്തമാകുകയും ആഗോള വിപണിയിൽ ഇന്ധനവില 90 ഡോളർ കടക്കുകയും ചെയ്ത സാഹചര്യത്തിലാണ് യുഎഇയിലും ഇന്ധനവില കൂട്ടിയത്. പെട്രോൾ ലിറ്ററിന് 20 ഫിൽസ് (ഏകദേശം ആറ് രൂപ)​ വീതമാണ് വർദ്ധിപ്പിച്ചത്. ഇതോടെ സൂപ്പർ പെട്രോളിന്റെ വില 3 ദിർഹം 60 ഫിൽസിൽ (94 രൂപ)​ നിന്നും 3 ദിർഹം 80 ഫിൽസ് (99 രൂപ)​ ആകും.

ഇന്ന് അർദ്ധരാത്രി മുതൽ പുതിയ നിരക്കുകൾ പ്രാബല്യത്തിൽ വരും. ഡീസൽ നിരക്കിൽ വലിയ വർദ്ധനയുണ്ടായത് ചരക്ക് നീക്കം ചെലവേറിയതാക്കും. കൂടാതെ ബസ്, ടാക്‌സി സർവീസുകളേയും വിലവർദ്ധന ബാധിക്കും.