ഗണേശ ചതുർത്ഥി ആഘോഷത്തിനിടെ ഫ്രിഡ്ജ് പൊട്ടിത്തെറിച്ച് വീടിന് തീപിടിച്ചു: ഒരു  കുടുംബത്തിലെ  നാലുപേർക്ക്  ദാരുണാന്ത്യം

ബംഗളൂരു: കർണാടകയിലെ ബെലഗാവിയിൽ ഗണേശ ചതുർത്ഥി ആഘോഷത്തിനിടെ ഫ്രിഡ്ജ് പൊട്ടിത്തെറിച്ചുണ്ടായ തീപിടിത്തത്തിൽ ഒരു കുടുംബത്തിലെ നാലുപേർക്ക് ദാരുണാന്ത്യം. ഗജാനൻ ദാമോനെ (65), ശാരദ ദാമോനെ (45), ഭാരതി ദാമോനെ (50), റോഷൻ ദാമോനെ (21) എന്നിവരാണ് മരിച്ചത്. അപകടത്തിൽ ഗുരുതരമായി പൊള്ളലേറ്റ പ്രിയ ദാമോനെ (28), ഗംഗ ദാമോനെ എന്നിവർ ചികിത്സയിലാണ്.

ബെലഗാവി സെൻട്രൽ ബസ് സ്റ്റാൻഡിന് സമീപത്തെ ചാവട് ഗല്ലിയിലെ വീട്ടിൽ തിങ്കളാഴ്ച രാത്രിയോടെയായിരുന്നു അപകടം. ഗണേശ ചതുർത്ഥി ആഘോഷങ്ങളുടെ ഭാഗമായി കുടുംബാംഗങ്ങൾ എല്ലാവരും വീട്ടിലുണ്ടായിരുന്ന സമയത്തായിരുന്നു അപകടം. ഫ്രിഡ്ജ് പൊട്ടിത്തെറിച്ച ഉടൻ വീടിന് തീപിടിക്കുകയായിരുന്നു. നിമിഷങ്ങൾക്കകം വീട് കത്തിയമരുകയായിരുന്നു.

തുടർന്ന് അഗ്നിരക്ഷാസേനയും പൊലീസും സ്ഥലത്തെത്തിയാണ് തീയണച്ചത്. പരിക്കേറ്റവരെ ഉടൻ തന്നെ ആശുപത്രിയിലെത്തിച്ചു. ഫ്രിഡ്ജ് പൊട്ടിത്തെറിക്കാനുണ്ടായ കാരണവും സാഹചര്യവും സംബന്ധിച്ച് അന്വേഷണം ആരംഭിച്ചതായി പൊലീസ് അറിയിച്ചു.