തിരുപ്പതിയിലെ ഫാക്ടറിയിൽ വൻ സ്‌ഫോടനം; നാല് മരണം, നിരവധി പേർക്ക് പരിക്ക്

അമരാവതി: തിരുപ്പതി ശ്രീ സിറ്റിയിലുള്ള ഫാർമസ്യൂട്ടിക്കൽ ഫാക്ടറിയിലുണ്ടായ സ്‌ഫോടനത്തിൽ നാലുപേർക്ക് ദാരുണാന്ത്യം. 10 പേർക്ക് ഗുരുതരമായി പരിക്കേറ്റിട്ടുണ്ട്. പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ചു. ഗൗരബ് റോയ് (35)​,​ ചിന്ന മസ്താൻ (36),​ രമേഷ് (40),​ വാസു (36)​​ എന്നിവരാണ് മരിച്ചതെന്നാണ് റിപ്പോർട്ട്.

ഇന്ന് രാവിലെ എട്ടുമണിയോടെയാണ് ടിഐഎൽ ഹെൽത്ത്‌കെയർ ഫാക്ടറിയിൽ സ്‌ഫോടനം ഉണ്ടായത്. ബോയിലറിലുണ്ടായ സ്‌ഫോടനമാണ് ദുരന്തത്തിന് കാരണമെന്നാണ് പ്രാഥമിക നിഗമനം. പരിക്കേറ്റവർക്ക് മികച്ച ചികിത്സ ഉറപ്പാക്കാൻ ഉദ്യോഗസ്ഥർക്ക് നിർദേശം നൽകിയതായി ശ്രീകാളഹസ്തി എംഎൽഎ ബൊജ്ജല സുധീർ റെഡ്ഡി അറിയിച്ചു.