ഭരണമാറ്റം ആവശ്യപ്പെടുന്നവർക്ക് സർക്കാർ ജോലിയില്ല; പുതിയ ഉത്തരവ് പുറത്തിറക്കി യുപി സർക്കാർ

ലക്‌നൗ: ഭരണമാറ്റം ആവശ്യപ്പെടുന്നവർക്ക് സർക്കാർ ജോലി നൽകില്ലെന്ന കർശന തീരുമാനവുമായി ഉത്തർപ്രദേശ് സർക്കാർ. സർക്കാർ ജോലികളിലേയ്ക്ക് നേരിട്ടുള്ള നിയമനത്തിനായി തിരഞ്ഞെടുക്കപ്പെടുന്ന ഉദ്യോഗാർത്ഥികളുടെ സ്വഭാവ പരിശോധനയ്ക്കുള്ള ചട്ടങ്ങൾ കർശനമാക്കിയിരിക്കുകയാണ് സർക്കാർ.

ഭരണമാറ്റം ലക്ഷ്യം വച്ചുള്ള അക്രമപ്രവർത്തനങ്ങളിൽ ഏർപ്പെടുന്നവരെ സർക്കാർ ജോലിയിൽ നിന്ന് വിലക്കുമെന്നാണ് ഉത്തരവിൽ വ്യക്തമാക്കുന്നത്. എന്നാൽ ഉദ്യോഗാർത്ഥിയുടെ രാഷ്ട്രീയ പ്രത്യയശാസ്ത്രത്തിന്റെ അടിസ്ഥാനത്തിൽ മാത്രം അവരെ അയോഗ്യരായി പ്രഖ്യാപിക്കില്ലെന്ന് ഉത്തരവിൽ വ്യക്തമാക്കിയിട്ടുണ്ട്. എഫ്.ഐ.ആർ രജിസ്റ്റർ ചെയ്യപ്പെട്ടതുകൊണ്ടോ അന്വേഷണം നിലനിൽക്കുന്നതുകൊണ്ടോ മാത്രം ഉദ്യോഗാർത്ഥി അയോഗ്യനാവുകയില്ലെന്നും ഉത്തരവിൽ പറയുന്നു.

അലഹബാദ് ഹൈക്കോടതിയുടെ നിർദേശപ്രകാരം നിയമനവും ഉദ്യോഗസ്ഥരും വകുപ്പ് പ്രിൻസിപ്പൽ സെക്രട്ടറി എം ദേവരാജ് ആണ് പുതിയ മാർഗനിർദേശങ്ങൾ പുറത്തിറക്കിയത്. സർക്കാർ വകുപ്പുകൾ, കോർപറേഷൻ, കൗൺസിൽ, തദ്ദേശ സ്ഥാപനങ്ങൾ എന്നിവിടങ്ങിലേയ്ക്ക് നേരിട്ടുള്ള നിയമനത്തിലൂടെ തിരഞ്ഞെടുക്കപ്പെട്ടവരെയാണ് പുതിയ നി‌ർദേശങ്ങൾ ബാധിക്കുന്നത്.

അക്രമത്തിലൂടെ ഭരണമാറ്റം ലക്ഷ്യംവച്ച് പ്രവർത്തിക്കുന്ന സംഘടനകളുടെ അംഗങ്ങളെയാണ് സർക്കാർ ജോലിയിൽ നിന്ന് വിലക്കുന്നതെന്ന് ഉത്തരവിൽ പറയുന്നു. ഒരു വ്യക്തി 21 വയസ് തികഞ്ഞതിന് ശേഷം, വെരിഫിക്കേഷൻ തീയതിക്ക് തൊട്ടുമുമ്പുള്ള മൂന്ന് വർഷത്തിനുള്ളിൽ ഇത്തരം പ്രവർത്തനങ്ങളിൽ പങ്കെടുത്തുവെന്നത് ആ വ്യക്തി ഇപ്പോഴും അത്തരം പ്രവർത്തനങ്ങളിൽ സജീവമായി ഏർപ്പെട്ടിരിക്കുന്നു എന്നതിന്റെ തെളിവായി കണക്കാക്കാമെന്നും ഉത്തരവിൽ വ്യക്തമാക്കുന്നു. അപേക്ഷ ലഭിച്ച് 30 ദിവസത്തിനുള്ളിൽ ജില്ലാ പൊലീസും ലോക്കൽ ഇന്റലിജൻസ് യൂണിറ്റും സ്വഭാവ പരിശോധനാ റിപ്പോർട്ടുകൾ നിയമന അധികാരിക്ക് സമർപ്പിക്കണമെന്നും നിർദേശമുണ്ട്.