ബാബ വാംഗെയുടെ 2027ലേക്കുള്ള പ്രവചനം പുറത്തുവന്നു; താമസിയാതെ ലക്ഷണങ്ങൾ കണ്ടേക്കാം

സോഫിയ: 2026 അവസാനിക്കാൻ മൂന്ന് മാസം മാത്രം ബാക്കി നിൽക്കെ 2027ലേക്കുള്ള ബൾഗേറിയൻ ജ്യോതിഷി ബാബ വാംഗയുടെ പ്രവചനം പുറത്തുവിട്ട് അനുയായികൾ. 2027ൽ മനുഷ്യർക്ക് അമാനുഷിക ശക്തികൾ നൽകുന്ന ഒരു നിഗൂഢ രോഗമോ ജനിതക പരീക്ഷണമോ ഉണ്ടാകുമെന്നാണ് വാംഗയുടെ പ്രവചനം. രോഗമോ പരീക്ഷണമോ വലിയൊരുകൂട്ടം മനുഷ്യരെ ബാധിക്കുമെങ്കിലും ചിലർക്ക് മാത്രമേ അമാനുഷിക ശക്തി ലഭിക്കുകയുള്ളൂവെന്നും വാംഗയുടെ അനുയായികൾ വെളിപ്പെടുത്തുന്നു.

2026ൽ വരാനിരിക്കുന്ന പ്രവചനങ്ങൾ എന്തൊക്കെ?

• ഒരു ഭീമാകാരനായ ബഹിരാകാശപേടകം ഭൂമിയുടെ അന്തരീക്ഷത്തിലേയ്ക്ക് പ്രവേശിക്കുകയും മനുഷ്യർ അന്യഗ്രഹജീവികളുമായി സമ്പർക്കത്തിലേർപ്പെടുകയും ചെയ്യും. നവംബറിൽ ഇത് സംഭവിക്കുമെന്നും അനുയായികൾ പറയുന്നു. അമേരിക്കൻ സർക്കാർ അന്യഗ്രഹജീവികളെ സംബന്ധിച്ച രഹസ്യരേഖകൾ പുറത്തുവിട്ട പശ്ചാത്തലത്തിലാണ് അവകാശവാദം.
• മൂന്നാം ലോകമഹായുദ്ധമാണ് മറ്റൊരു പ്രവചനം. ചൈന തായ്‌വാൻ പിടിച്ചടക്കുമെന്നും റഷ്യയും അമേരിക്കയും നേരിട്ട യുദ്ധം ചെയ്യുമെന്നും വാംഗ പ്രവചിച്ചിട്ടുള്ളതായി അനുയായികൾ പറയുന്നു.
• 2026 അവസാനിക്കുന്നതിനുമുൻപ് റഷ്യൻ പ്രസിഡന്റ് വ്ളാഡിമിർ പുടിന് അധികാരം നഷ്ടപ്പെടുമെന്നാണ് മറ്റൊരു പ്രവചനം. പുടിനുപകരം മറ്റൊരു നേതാവ് അധികാരത്തിലെത്തുമെന്നും വാംഗ പ്രവചിച്ചതായി അനുയായികൾ അവകാശപ്പെടുന്നു.

2026ലെ മറ്റ് പ്രവചനങ്ങൾ

ലോകമെമ്പാടുമുണ്ടാകാൻ സാദ്ധ്യതയുള്ള പ്രകൃതി ദുരന്തങ്ങളെക്കുറിച്ചായിരുന്നു വാംഗയുടെ 2026ലെ ആദ്യ പ്രവചനം. കഴിഞ്ഞ മാർച്ചിൽ മ്യാൻമറിലുണ്ടായ 7.7 തീവ്രത രേഖപ്പെടുത്തിയ ഭൂകമ്പം, സ്‌പെയിൻ, പോർച്ചുഗൽ, ഗ്രീസ്, ഇറ്റലി, ഫ്രാൻസ് തുടങ്ങിയ രാജ്യങ്ങളിലുണ്ടായ കാട്ടുതീ, ഏഷ്യൻ രാജ്യങ്ങളിലെ പ്രളയം, യുഎസിലെ ശക്തമായ കൊടുങ്കാറ്റ് എന്നിവ ഇതിനുദാഹരണമായി അനുയായികൾ ചൂണ്ടിക്കാട്ടുന്നു.

രണ്ടാമത്തെ പ്രവചനം ആർട്ടിഫിഷ്യൽ ഇന്റലിജൻസിനെക്കുറിച്ചും (എഐ) തൊഴിൽ മേഖലയിലെ യന്ത്രവത്‌കരണത്തെക്കുറിച്ചുമാണ്. മനുഷ്യരുടെ തൊഴിലിനെ എഐ മാറ്റിസ്ഥാപിക്കുമെന്ന് വാംഗ പ്രവചിച്ചിരുന്നതായി അനുയായികൾ അവകാശപ്പെടുന്നു.