ദേശീയ പ്രവേശന പരീക്ഷകൾക്ക് സജ്ജരായി വിദ്യാർത്ഥികൾ

തിരുവനന്തപുരം: പ്ലസ് ടു പരീക്ഷകൾ പൂർത്തിയാകുന്നതോടെ കരിയറിലെ നിർണായകമായ പ്രവേശന പരീക്ഷാ കാലത്തിലേക്ക് പ്രവേശിച്ച് വിദ്യാർത്ഥികൾ രാജ്യത്തെ പ്രമുഖ മെഡിക്കൽ, എൻജിനിയറിംഗ്, സെൻട്രൽ യൂണിവേഴ്സിറ്റികൾ എന്നിവിടങ്ങളിലേക്കുള്ള 2026-ലെ പ്രവേശന പരീക്ഷാ കലണ്ടർ ദേശീയ പരീക്ഷാ ഏജൻസി പുറത്തുവിട്ടു. വിശദവിവരങ്ങൾക്കായി nta.ac.in, cee.kerala.gov.in സന്ദർശിക്കാം.

 മെഡിക്കൽ സ്വപ്നങ്ങൾക്കായി നീറ്റ്

രാജ്യത്തെ എം.ബി.ബി.എസ്, ബി.ഡി.എസ്, ആയുഷ് കോഴ്സുകളിലേക്കുള്ള ഏകീകൃത പ്രവേശന പരീക്ഷയായ നീറ്റ് യു.ജി 2026 മേയ് 3-ന് നടക്കും. ഉച്ചയ്ക്ക് 2 മണി മുതൽ 5.20 വരെ ഓഫ്‌ലൈൻ രീതിയിലായിരിക്കും പരീക്ഷ. ഇതിനായുള്ള അപേക്ഷാ നടപടികൾ പൂർത്തിയായിക്കഴിഞ്ഞു. ഏപ്രിൽ അവസാന വാരത്തോടെ അഡ്മിറ്റ് കാർഡുകൾ എൻ.ടി.എ വെബ്സൈറ്റിൽ ലഭ്യമാകും. ഫിസിക്സ്, കെമിസ്റ്റി, ബയോളജി വിഷയങ്ങളിൽ നിന്നുള്ള ചോദ്യങ്ങളാണ് പരീക്ഷയിലുണ്ടാകുക.

 സാങ്കേതിക മികവിന് ജെ.ഇ.ഇ മെയിൻ

ഐ.ഐ.ടികളിലേക്കും എൻ.ഐ.ടികളിലേക്കുമുള്ള പ്രവേശനത്തിനായുള്ള ജെ.ഇ.ഇ മെയിൻ രണ്ടാംഘട്ട പരീക്ഷകൾ 2026 ഏപ്രിൽ 2 മുതൽ 8 വരെ വിവിധ ഷിഫ്റ്റുകളിലായി നടക്കും. ഏപ്രിൽ 2, 4, 5, 6, 8 തീയതികളിൽ ബി.ഇ,​ ബി.ടെക് പരീക്ഷകളും ഏപ്രിൽ 7-ന് ബി.ആർക് പരീക്ഷയുമാണ് നിശ്ചയിച്ചിരിക്കുന്നത്. ജെ.ഇ.ഇ മെയിൻ പരീക്ഷയിൽ മികച്ച റാങ്ക് നേടുന്നവർക്ക് മേയ് അവസാന വാരം നടക്കുന്ന ജെ.ഇ.ഇ അഡ്വാൻസ്ഡ് കമ്പ്യൂട്ടർ അധിഷ്ഠിത പരീക്ഷയ്ക്ക് അപേക്ഷിക്കാം.

 സംസ്ഥാന എൻജിനിയറിംഗ് പ്രവേശനം

കേരളത്തിലെ എൻജിനിയറിംഗ്, ഫാർമസി കോഴ്സുകളിലേക്കുള്ള കീം പരീക്ഷ ഏപ്രിൽ 17 മുതൽ 23 വരെ നടക്കും. പരീക്ഷാ ഫലം മേയ് പകുതിയോടെ പ്രസിദ്ധീകരിക്കും. കേരളത്തിലെ മെഡിക്കൽ പ്രവേശനത്തിന് കീം പരീക്ഷയില്ല പകരം നീറ്റ് റാങ്ക് അടിസ്ഥാനമാക്കിയാണ് അലോട്ട്‌മെന്റ്.

 കേന്ദ്ര സർവകലാശാലകളിലേക്ക് സി.യു.ഇ.ടി.

വിവിധ കേന്ദ്ര സർവകലാശാലകളിലെ ബിരുദ പഠനത്തിനായി നടത്തുന്ന സി.യു.ഇ.ടി പരീക്ഷകൾ മേയ് 11 മുതൽ 31 വരെ നടക്കും. തിരഞ്ഞെടുക്കുന്ന വിഷയങ്ങൾക്കനുസരിച്ച് വ്യത്യസ്ത ദിവസങ്ങളിലായാണ് പരീക്ഷ. ജെ.എൻ.യു, ഡി.യു തുടങ്ങിയ പ്രമുഖ സ്ഥാപനങ്ങളിലെ പ്രവേശനം ഈ പരീക്ഷയിലെ മികവ് അനുസരിച്ചായിരിക്കും.

 വിദ്യാർത്ഥികൾക്ക് നിർദ്ദേശങ്ങൾ:

1. പരീക്ഷാ കേന്ദ്രത്തിലേക്കുള്ള യാത്രകൾ മുൻകൂട്ടി പ്ലാൻ ചെയ്യുക

2. അഡ്മിറ്റ് കാർഡിനൊപ്പം തിരിച്ചറിയൽ രേഖയും കരുതുക

3. അവസാന നിമിഷം പുതിയ പാഠഭാഗങ്ങൾ പഠിക്കരുത്

4.പഠിച്ചവ ആവർത്തിക്കുക. മോക്ക് ടെസ്റ്റുകൾ ചെയ്യുക

5. ആരോഗ്യകരമായ ഭക്ഷണക്രമവും വിശ്രമവും പാലിക്കുക