ബിൽക്കിസ് ബാനു കേസിൽ നോട്ടീസ്

ന്യൂഡൽഹി: ബിൽക്കിസ് ബാനു കേസിലെ ജീവപര്യന്തം കഠിനതടവിനെതിരെ രണ്ടു കുറ്റവാളികൾ സമർപ്പിച്ച ഹർജിയിൽ നോട്ടീസ് അയയ്ക്കാൻ ഉത്തരവിട്ട് സുപ്രീംകോടതി. ഗുജറാത്ത്,​ മഹാരാഷ്ട്ര സർക്കാരുകൾക്കാണ് നോട്ടീസ്. ജസ്റ്റിസുമാരായ രാജേഷ് ബിൻഡൽ,​ വിജയ് ബിഷ്‌ണോയ് എന്നിവരടങ്ങിയ ബെഞ്ചിന്റേതാണ് നടപടി. കനയ്യലാൽ ജോഷി. പ്രദീപ് രമൺലാൽ മോദിയ എന്നിവരാണ് കോടതിയെ സമീപിച്ചത്. ഗുജറാത്ത് കലാപത്തിനിടെ ബിൽക്കിസ് ബാനുവിനെ കൂട്ടബലാത്സംഗം ചെയ്‌തതിനും,​ മൂന്നര വയസുള്ള മകളെ അടക്കം കുടുംബത്തിലെ 14 പേരെ കൊലപ്പെടുത്തുകയും ചെയ്‌തെന്ന കേസിലാണ് കുറ്റവാളികൾ ജീവപര്യന്തം കഠിനതടവ് അനുഭവിക്കുന്നത്. വിചാരണക്കോടതി വിധിച്ച ശിക്ഷ ബോംബെ ഹൈക്കോടതി ശരിവച്ചിരുന്നു. ഇവരുടെ ഹർജി സുപ്രീംകോടതി മേയ് 5ന് വീണ്ടും പരിഗണിക്കും.