ഗൃഹനാഥന്റെ ജീവനെടുത്തത് ദേശീയപാതയിലെ കുഴി

അമ്പലപ്പുഴ: ഗൃഹനാഥന്റെ രക്തം വാർന്നുള്ള മരണ കാരണം

ദേശീയപാതയിലെ കുഴിയിൽ വീണ് കാലിലേറ്റ പരിക്കാണെന്ന് പോസ്റ്റ്മോർട്ടം റിപ്പോർട്ട്. കരൂർ വാടയ്ക്കകത്ത് സതീശനാണ് (65) കഴിഞ്ഞ ദിവസം രക്തം വാർന്ന് മരിച്ചത്. കൂലിപ്പണികഴിഞ്ഞ് വീട്ടിലേക്ക് മടങ്ങുന്നതിനിടെ,​ കരൂർ ജംഗ്ഷനിലെ സർവ്വീസ് റോഡും ഹൈവെയും വേർതിരിക്കുന്ന ഡിവൈഡറിനിടയിലെ കുഴിയിൽ സതീശന്റെ കാൽ അകപ്പെട്ടു. കുഴി നിറയെ പ്ലാസ്റ്റിക്കും കുപ്പിച്ചില്ലുമായിരുന്നു. ആസ്പിരിൻ ഗുളിക സ്ഥിരമായി കഴിക്കുന്ന സതീശന്റെ കാലിലുണ്ടായ മുറിവിൽ നിന്ന് രക്തം അനിയന്ത്രിതമായി വാർന്നൊലിച്ചതോടെ അബോധാവസ്ഥയിലായി. ഈ മുറിവാണ് മരണത്തിന് കാരണമെന്ന് ആലപ്പുഴ മെഡിക്കൽ കോളേജ് ആശുപത്രിയിൽ നടത്തിയ പോസ്റ്റ് മോർട്ടത്തിലാണ് വ്യക്തമായത്. ദേശീയപാതാ നിർമ്മാണത്തിലെ അപാകതയാണ് സതീശന്റെ ജീവൻ പൊലിയാൻ കാരണമെന്ന് നാട്ടുകാർ ആരോപിച്ചു.