തിരുവനന്തപുരം: ലോക്ക് ഡൗൺ ഇളവ് വരുത്തിയ സാഹചര്യത്തിൽ യാത്രാ നിയന്ത്രണങ്ങളിൽ വ്യക്തത വരുത്തി പൊലീസ് മേധാവി ലോക്നാഥ് ബെഹ്റ മാർഗനിർദ്ദേശം പുറത്തിറക്കി. അൺലോക്ക്, ഭാഗിക ലോക്ക് ഡൗൺ നിലവിലുളള സ്ഥലങ്ങളിലേക്കും തിരിച്ചും യാത്ര ചെയ്യുന്നതിന് പാസ് ആവശ്യമില്ല. എന്നാൽ പൂരിപ്പിച്ച സത്യവാങ്മൂലം കരുതണം. ഈ രണ്ട് വിഭാഗത്തിൽപ്പെട്ട സ്ഥലങ്ങളിൽ നിന്ന് സമ്പൂർണ ലോക്ക്ഡൗണുള്ള സ്ഥലങ്ങളിലേക്കും തിരിച്ചും മെഡിക്കൽ ആവശ്യങ്ങൾ, വിവാഹച്ചടങ്ങുകൾ, മരണാനന്തരച്ചടങ്ങുകൾ, നിർമ്മാണ പ്രവർത്തനങ്ങൾ, വ്യാവസായിക ആവശ്യങ്ങൾ മുതലായവയുമായി ബന്ധപ്പെട്ട് യാത്ര ചെയ്യുന്നവർക്ക് പൊലീസ് പാസ് ആവശ്യം. ട്രിപ്പിൾ ലോക്ക്ഡൗണുള്ള സ്ഥലങ്ങളിൽ നിന്ന് അകത്തേക്കും പുറത്തേക്കും പരീക്ഷകൾക്കും മെഡിക്കൽ ആവശ്യങ്ങൾക്കും മരണാനന്തര ചടങ്ങുകൾക്കും മാത്രമേ യാത്ര അനുവദിക്കൂ. യാത്രചെയ്യുന്നവർ തിരിച്ചറിയൽ കാർഡ്, ഹാൾടിക്കറ്റ്, മെഡിക്കൽ രേഖകൾ എന്നിവയിൽ അനുയോജ്യമായവ കരുതണം. ബെവ്കോ ഒൗട്ട്ലെറ്റുകളിലും ബാറുകളിലും മദ്യം വാങ്ങാനെത്തുന്നവർ മാസ്ക് ധരിക്കണം, സാനിറ്റൈസർ കരുതണം. ഇത് നിരീക്ഷിക്കാൻ പ്രത്യേക പൊലീസ് സംവിധാനം.
പൊലീസ് പാസിന്
ആവശ്യമായ രേഖകൾ സഹിതം വെള്ള പേപ്പറിൽ അപേക്ഷ തയ്യാറാക്കി നൽകിയാൽ ബന്ധപ്പെട്ട പൊലീസ് സ്റ്റേഷനിൽ നിന്ന് പാസ് ലഭിക്കും. അപേക്ഷയിൽ എത്തിച്ചേരേണ്ട സ്ഥലത്തെ തദ്ദേശ സ്ഥാപനത്തിന്റെ പേരും വാർഡ് നമ്പരും ഉൾപ്പെടെയുളള വിലാസം, യാത്രയുടെ ആവശ്യം, യാത്ര ചെയ്യുന്നവരുടെ പേര്- വിലാസം, മൊബൈൽ നമ്പർ, വാഹനത്തിന്റെ നമ്പർ എന്നിവ ഉൾപ്പെടുത്തണം.
ആവശ്യാനുസരണം ബസ്, ബോട്ട് സർവീസുകൾ: മന്ത്രി ആന്റണി രാജു
കൊവിഡ് നിയന്ത്രണങ്ങളിൽ ഇളവനുവദിച്ച സാഹചര്യത്തിൽ യാത്രക്കാരുടെ ആവശ്യാനുസരണം ഇന്നു മുതൽ കെ.എസ്.ആർ.ടി.സി പരിമിതമായും ജല ഗതാഗത വകുപ്പിന്റെ ബോട്ടുകൾ 50 ശതമാനവും സർവീസുകൾ നടത്തുമെന്ന് മന്ത്രി ആന്റണി രാജു അറിയിച്ചു. രാവിലെ ഏഴ് മുതൽ രാത്രി ഏഴ് വരെയാണ് ബോട്ട് സർവീസ്.
കൊവിഡ് പ്രോട്ടോക്കോൾ പാലിച്ച് യാത്രക്കാർ കൂടുതലുള്ള സ്ഥലങ്ങളിലേക്കാണ് സർവീസുകൾ. തദ്ദേശ സ്വയംഭരണ സ്ഥാപനങ്ങൾ സി, ഡി കാറ്റഗറിയിൽ ഉൾപ്പെടുത്തിയ (ടെസ്റ്റ് പോസിറ്റിവിറ്റി നിരക്ക് 20% കൂടിയ) പ്രദേശങ്ങളിൽ സ്റ്റോപ്പ് അനുവദിക്കില്ല. ഓർഡിനറി ബസുകളിൽ 12 മണിക്കൂർ എന്ന നിലയിൽ യാത്രാക്കാരുടെ ആവശ്യാനുസരണമാകും സർവീസ് നടത്തുക. യാത്രാക്കാർ കൂടുതലുള്ള തിങ്കൾ, വെള്ളി ദിവസങ്ങളിൽ കൂടുതൽ സർവീസുകൾ നടത്തും.
സമ്പൂർണ ലോക്ഡൗൺ പ്രഖ്യാപിച്ചിരിക്കുന്ന ശനി, ഞായർ ദിവസങ്ങളിൽ അവശ്യ സർവീസുകളേ ഉണ്ടാകൂ. ഞാറാഴ്ച ഉച്ചയ്ക്ക് ശേഷം ദീർഘദൂര സർവീസുകൾ പുനഃരാരംഭിക്കും.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |