ഐ.എഫ്.എഫ്.കെ ഫെബ്രു. 4 മുതൽ, ഡോക്യുമെന്ററി മേള ഡിസംബറിൽ

തിരുവനന്തപുരം.സംസ്ഥാന ചലച്ചിത്ര അക്കാദമി സംഘടിപ്പിക്കുന്ന 26 -ാമത് രാജ്യാന്തര ചലച്ചിത്രമേളയും (ഐ.എഫ്.എഫ്.കെ ) 13 -ാമത് രാജ്യാന്തര ഡോക്യുമെന്ററി, ഹ്രസ്വചിത്രമേളയും തിരുവനന്തപുരത്ത് നടക്കും.കേരളത്തിന്റെ രാജ്യാന്തര ചലച്ചിത്രമേളയുടെ 26 -ാമത് എഡിഷൻ 2022 ഫെബ്രുവരി നാലു മുതൽ 11 വരെ നടക്കും. മേളയുടെ ഉദ്ഘാടനം നിശാഗന്ധി ഓഡിറ്റോറിയത്തിൽ നാലിന് വൈകീട്ട് 6 മണിക്ക് മുഖ്യമന്ത്രി പിണറായി വിജയൻ നിർവഹിക്കും. തിരുവനന്തപുരത്തെ പന്ത്രണ്ടോളം തിയേറ്ററുകളിലായി എട്ട് ദിവസം നീണ്ടു നില്‍ക്കുന്ന ഐ.എഫ്.എഫ് .കെയുടെ 26 -ാം പതിപ്പ് രാജ്യാന്തര ചലച്ചിത്രമേളയുടെ എല്ലാ പ്രൗഢിയോടെയും നടത്താനാണ് സർക്കാർ ഉദ്ദേശിക്കുന്നത്.കോവിഡ് വ്യാപനത്തിന്റെ പശ്ചാത്തലത്തിൽ‍ കഴിഞ്ഞ ജൂലൈ മാസം നടത്താൻ‍ കഴിയാതിരുന്ന രാജ്യാന്തര ഡോക്യുമെന്ററി ഹ്രസ്വചിത്രമേള 2021 ഡിസംബർ 9 മുതൽ‍ 14 വരെ തിരുവനന്തപുരം ഏരീസ് പ്ളക്സ് എസ് എൽ‍ തിയേറ്റർ‍ കോംപ്ളക്സിലെ നാല് സ്ക്രീനുകളിൽ നടക്കും. മേളയുടെ ഉദ്ഘാടനം മുഖ്യമന്ത്രി പിണറായി വിജയൻ ഏരീസ് പ്ളക്സ് എസ്.എൽ‍ തിയേറ്ററിലെ ഓഡി 1ൽ ഡിസംബർ‍ 9 ന് നിർവഹിക്കും.