ശബരിമലയിൽ ആധുനിക വിശ്രമകേന്ദ്രങ്ങൾ

തിരുവനന്തപുരം: ശബരിമല,പമ്പ, നിലയ്ക്കൽ എന്നിവിടങ്ങളിൽ ആധുനികസൗകര്യങ്ങളോടു കൂടിയ വിശ്രമകേന്ദ്രങ്ങൾ സജ്ജീകരിക്കുകയാണെന്ന് മന്ത്രി കെ.മുരളീധരൻ നിയമസഭയെ അറിയിച്ചു. ശബരിമലയിൽ 5000 പേർക്ക് ഒരേസമയം ഭക്ഷണം കഴിക്കുവാനുള്ള അന്നദാനമണ്ഡപം, തീർത്ഥാടകർക്ക് വിശ്രമിക്കുന്നതിനുള്ള ദർശനം കോംപ്ലക്സ്, ആധുനിക ടോയ്ലറ്റുകൾ,​ നിലയ്ക്കലിൽ കൂടുതൽ പാർക്കിംഗ് സൗകര്യം എന്നിവ സജ്ജീകരിച്ചിട്ടുണ്ട്. നിലയ്ക്കലിൽ 9.33 ഹെക്ടർ സ്ഥലത്ത് കോർ ഏരിയ വികസനപദ്ധതി നടപ്പാക്കും. അന്നദാനമണ്ഡപം, റെസ്റ്റിംഗ് പവലിയനുകൾ, നടപ്പാതകൾ, അഡ്മിനിസ്‌ട്രേറ്റീവ് ബ്ലോക്ക് എന്നിവ ഉൾപ്പെടുന്ന പദ്ധതിക്ക് സർക്കാർ ഭരണാനുമതി നൽകി.