ഹിമാലയത്തിലെ നിബിഡ വനത്തിൽ താമസമാക്കിയ വമ്പൻ ഇരപിടിയന്മാർ, കേരളത്തിലെ കാട്ടിലും ഇവരെ കണ്ടെത്തി

കുറ്റിയാടി: വിവിധയിനം ശലഭങ്ങളുടെയും പക്ഷികളുടെയും വാസസ്ഥലമായ ജാനകിക്കാട്ടിൽ വീണ്ടും അതിഥികളെത്തി. അപൂർവയിനത്തിൽപ്പെട്ട 'കൊള്ളിയാൻ' 'കാട്ടുമൂങ്ങ' എന്നീ പേരുകളിൽ അറിയപ്പെടുന്ന സ്‌പോട്ട്ബെല്ലീഡ് ഈഗിൾ ഔളിനെയാണ് ജാനകിക്കാട്ടിൽ കണ്ടെത്തിയത്. നിബിഡ വനങ്ങളിൽ മാത്രം വളരെ രഹസ്യസ്വഭാവത്തോടെ കഴിയുന്ന ഈ പക്ഷികളുടെ സാന്നിദ്ധ്യം കോഴിക്കോട് ജില്ലയിൽ ആദ്യമായിരിക്കുമെന്ന് വൈൽഡ്ലൈഫ് ഫോട്ടോഗ്രാഫറും പക്ഷിനിരീക്ഷകനുമായ സുനിൽ ടിറ്റോ, ജാനകിക്കാട് ഇക്കോ ടൂറിസം ഗൈഡും പക്ഷിനിരീക്ഷകനുമായ സുധീഷ് എ എന്നിവർ പറഞ്ഞു. ഇവരാണ് ഈ പക്ഷികളെ കണ്ടെത്തിയത്.

കരുത്തുറ്റ ഇരപിടിയന്മാരായ ഇവർ രാത്രികാലങ്ങളിലാണ് പ്രധാനമായും ഇരതേടാനിറങ്ങുന്നത്. ഇന്ത്യയിൽ കാണപ്പെടുന്ന മൂങ്ങകളിൽ വലിപ്പത്തിൽ രണ്ടാം സ്ഥാനത്താണ് ഇവ. ഹിമാലയൻ താഴ്വരകളായ കുമയോൺ മുതൽ മ്യാന്മാർ, ലാവോസ്, വിയറ്റ്നാം വരെയുള്ള പ്രദേശങ്ങളിലും ഇന്ത്യയിലുടനീളവും ശ്രീലങ്ക, തായ്ലൻഡ് എന്നിവിടങ്ങളിലും ഇവയെ കണ്ടുവരുന്നു.