കണ്ണൂരിനു വീണ്ടും കാൽപന്ത് ലഹരി; ജവഹർ സ്റ്റേഡിയം സജ്ജമാകുന്നു

കണ്ണൂർ: പുൽമൈതാനത്ത് വീണ്ടും ആരവമുയരാൻ ഇനി നാളുകൾ മാത്രം. സൂപ്പർ ലീഗ് കേരളയുടെ മൂന്നാം സീസണിന് കണ്ണൂർ ജവഹർ സ്റ്റേഡിയത്തിൽ തുടക്കമാകാൻ ഇനി ദിവസങ്ങൾ മാത്രം. നിലവിലെ ജേതാക്കളായ കണ്ണൂർ വാരിയേഴ്സ് എഫ്.സിയുടെ ഹോം ഗ്രൗണ്ടിൽ ഒരുക്കങ്ങൾ തകൃതിയാണ്.
ഗ്രൗണ്ടിനു ചുറ്റുമുള്ള കാടുകൾ വെട്ടിത്തെളിച്ചുള്ള ഒന്നാം ഘട്ട പ്രവർത്തനങ്ങൾ പൂർത്തിയായി. സൂപ്പർ ലീഗ് നിലവാരത്തിലേക്ക് മൈതാനത്തെ ഉയർത്താനുള്ള രണ്ടാം ഘട്ട പ്രവർത്തനങ്ങളുടെ ഭാഗമായി ഗ്രൗണ്ടിൽ പുല്ല് വെച്ചുപിടിപ്പിക്കുന്ന ജോലികൾ നടക്കുന്നു. ഗ്യാലറി പെയിന്റിംഗ്, താൽക്കാലിക ഫ്ലഡ് ലിറ്റ് സംവിധാനം, ഡ്രെസ്സിംഗ് റൂം, മെഡിക്കൽ റൂം, മീഡിയ റൂം, സംപ്രേഷണത്തിനു വേണ്ട പ്രത്യേക സൗകര്യങ്ങൾ എന്നിവയുടെ നിർമാണം വരും ദിവസങ്ങളിൽ ആരംഭിക്കും.

30,000 പേർക്ക് ഇരിക്കാവുന്ന ജവഹർ സ്റ്റേഡിയം, കണ്ണൂർ വാരിയേഴ്സിന്റെ ഹോം ഗ്രൗണ്ടെന്ന നിലയിൽ കഴിഞ്ഞ സീസണിലും ആരാധകപ്പെരുപ്പം കൊണ്ട് ശ്രദ്ധേയമായിരുന്നു.
സെപ്തംബർ 25ന് കണ്ണൂർ വാരിയേഴ്സും ഫൈനലിസ്റ്റുകളായ തൃശൂർ മാജിക് എഫ്സിയും തമ്മിലുള്ള മത്സരത്തോടെയാണ് സൂപ്പർ ലീഗ് കേരള മൂന്നാം സീസണിന് കണ്ണൂരിൽ തുടക്കമാകുന്നത്. മത്സരങ്ങളുടെ തത്സമയ സംപ്രേഷണത്തിനായി സീ 5, യുണൈറ്റ് 8 ചാനലുകളുമായുള്ള ചർച്ചകൾ അന്തിമഘട്ടത്തിലാണെന്നും അധികൃതർ അറിയിച്ചു.

പുതിയ നിയമങ്ങളുമായി മൂന്നാം സീസൺ
സൂപ്പർ ലീഗ് കേരള മൂന്നാം സീസണിൽ ചില സുപ്രധാന മാറ്റങ്ങളും വരുന്നുണ്ട്. സെമിഫൈനൽ മത്സരങ്ങൾ ഇത്തവണ ഹോം ആൻഡ് എവേ അടിസ്ഥാനത്തിലായിരിക്കും. ഗ്രൂപ്പ് ഘട്ടം മുതൽ തന്നെ സമനില ഒഴിവാക്കാൻ, 90 മിനിറ്റ് കഴിഞ്ഞും സ്‌കോർ ഒപ്പത്തിനൊപ്പമായാൽ പെനാൽറ്റി ഷൂട്ടൗട്ട് നടത്തി ജയപരാജയം നിശ്ചയിക്കുന്ന പുതിയ രീതിയും ഇത്തവണ മുതൽ നടപ്പാക്കും. നിലവിൽ ആറ് ടീമുകളാണ് ലീഗിലുള്ളതെങ്കിലും, പാലക്കാട്, കാസർകോട് എന്നിവിടങ്ങളിൽനിന്നുള്ള പുതിയ ഫ്രാഞ്ചൈസികൾ വരും സീസണിൽ ലീഗിന്റെ ഭാഗമാകും.

കിരീടം നിലനിർത്താൻ വാരിയേഴ്സ്

കഴിഞ്ഞ സീസണിൽ കിരീടം നേടിയ കണ്ണൂർ വാരിയേഴ്സിന് ഇത്തവണ സ്വന്തം മണ്ണിൽ കിരീടം നിലനിർത്തുകയെന്ന വെല്ലുവിളി കൂടിയുണ്ട്. മൂന്നാം സീസണിലേക്കുള്ള 26 അംഗ ടീമിന്റെ സൈനിംഗ് പൂർത്തിയാക്കി. ആറ് വിദേശ താരങ്ങളും എട്ട് കണ്ണൂർ താരങ്ങളും അടങ്ങുന്ന സ്‌ക്വാഡിനെ നയിക്കാൻ റഷ്യൻ പരിശീലകൻ ആൻഡ്രി ചെർനിഷോവിനെയാണ് പുതിയ ഹെഡ് കോച്ചായി നിയമിച്ചിരിക്കുന്നത്. കഴിഞ്ഞ സീസണിൽ മികച്ച യുവതാരത്തിനുള്ള പുരസ്‌കാരം നേടിയ മുഹമ്മദ് സിനാൻ ഉൾപ്പെടെ പ്രമുഖ താരങ്ങളുടെ കരാർ ദീർഘിപ്പിച്ചതിനൊപ്പം, സ്പാനിഷ് താരം വാരോ അൽവാരസ്, ഘാന താരം ഫ്രെഡറിക് അൻസ ബോച്ച്വേ എന്നിവരുൾപ്പെടെ പുതിയ വിദേശ, ആഭ്യന്തര താരങ്ങളെയും ടീമിൽ എത്തിച്ചിട്ടുണ്ട്.