ഇരുമ്പ്പാലം- തൊട്ടുമുഖം... മാതൃകാ റോഡി​ന് വണക്കം!

കൊല്ലം: കല്ലുപാലം- തോട്ടുമുഖം കനാൽ റോഡ് പൊട്ടിപ്പൊളിഞ്ഞ് യാത്ര ദുസ്സഹമായിട്ടും പരിഹാര മാർഗ്ഗങ്ങളില്ല. റോഡരികുകൾ കാട് കയറിയതും മാലിന്യ നിക്ഷേപ കേന്ദ്രമായതും നാട്ടുകാർക്ക് തലവേദനയായി.

കല്ലുപാലത്തിൽ നിന്നു തുടങ്ങി പള്ളിത്തോട്ടം വഴിയുള്ള മൂന്ന് കിലോമീറ്ററോളം റോഡാണ് കുണ്ടും കുഴിയുമായത്. നിലവിൽ ഈ റോഡിന്റെ പല ഭാഗങ്ങളും കാൽനടയാത്ര പോലും ദുസഹമാകും വിധം തകർന്ന് കിടക്കുകയാണ്. മഴ തുടങ്ങിയതോടെ കുഴികളിൽ വെള്ളം കെട്ടിക്കിടക്കുന്നു. വാഹനങ്ങൾ കടന്നു പോകുമ്പോൾ ചെളി വെള്ളം കാൽനടയാത്രികരുടെ മേൽ തെറിക്കുന്നുണ്ട്.. പൊട്ടിപ്പൊളിഞ്ഞ് കിടക്കുന്ന ഭാഗങ്ങളിൽ ഇരുചക്ര വാഹനയാത്രികർ അപകടത്തിൽപ്പെടുന്നതും പതിവായി.

ഈ റോഡ് പൂർണതോതിൽ ടാറിംഗ് നടത്തി യാത്രായോഗ്യമാക്കിയിട്ട് നാളുകളായി. താത്കാലികമായെങ്കിലും കുഴികളടച്ച് യാത്ര സുഗമമാക്കാൻ നടപടി വേണമെന്നാണ് നാട്ടുകാരുടെ ആവശ്യം.

 കുന്നുകൂടി മാലിന്യവും

ഈ റോഡിന്റെ ഭൂരിഭാഗവും കാടുകയറിയ നിലയിലാണ്. ഇവിടങ്ങളിൽ മാലിന്യം നിക്ഷേപിക്കുന്നവരുടെ എണ്ണവും ദിനംപ്രതി വർദ്ധിക്കുന്നു. പലേടത്തും വലിയ മാലിന്യക്കൂന തന്നെ പ്രത്യക്ഷപ്പെട്ടിട്ടുണ്ട്. മാലിന്യം നിക്ഷേപിക്കരുതെന്ന മുന്നറിയിപ്പ് ബോർഡുകളൊന്നും ആരും ഗൗനിക്കുന്നില്ല. ഇവിടങ്ങളിൽ തെരുവ് നായ്ക്കളുടെ ശല്യവും കൂടി.