ജില്ലയിൽ പിടിമുറുക്കി 'വടക്കൻ സംഘം'.... ഓൺലൈൻ തട്ടിപ്പ് : തലവയ്‌‌ക്കരുതേ

കോട്ടയം : ഓൺലൈൻ ജോലി, ഓഹരി നിക്ഷേപം,​ ക്രിപ്ടോ കറൻസി, ട്രേഡിംഗ്... ജില്ലയിൽ നിന്ന് ലക്ഷങ്ങൾ ഓൺലൈൻ തട്ടിപ്പിലൂടെ കവർന്നവർ ഒന്നുകിൽ വടക്കൻ ജില്ലക്കാർ, അല്ലെങ്കിൽ അന്യസംസ്ഥാനക്കാർ. സാക്ഷരതയിൽ മുന്നിലാണ് കോട്ടയമെങ്കിലും ഓൺലൈൻ സാക്ഷരതാക്കുറവ് ചൂഷണം ചെയ്യുകയാണ്. ഇതിനോടകം അറസ്റ്റിലായവരിൽ ഭൂരിഭാഗവും തൃശൂർ,​ കോഴിക്കോട്,​ മലപ്പുറം,​ കാസർകോട് ജില്ലക്കാരാണ്. പ്രത്യേക സംഘം തട്ടിപ്പിനായി ജില്ലയിൽ വരവിരിച്ചിട്ടുണ്ടോയെന്നും പൊലീസ് പരിശോധിക്കുന്നുണ്ട്. പൊലീസ് മുൻകരുതൽ ആവർത്തിച്ചിട്ടും ഇപ്പോഴും കെണിയിൽ വീഴുന്നവരുണ്ട്. സമൂഹമാദ്ധ്യമങ്ങളിലൂടെ പരിചയം സ്ഥാപിച്ചാണ് തട്ടിപ്പിന് തുടക്കം. പണം പോയിട്ടും പരാതി പറയാത്തവരുമേറെയാണ്.

 അക്കൗണ്ടുകളും വാടകയ്ക്ക്

സജീവമല്ലാത്ത അക്കൗണ്ടുകൾ പ്രതിമാസം 10000-25000 രൂപ വരെ വാടക നൽകി തട്ടിപ്പുകാർ ഏറ്റെടുക്കുകയാണ്. ചേനപ്പാടി സ്വദേശിയിൽ നിന്ന് പണം അപഹരിച്ചത് ഇങ്ങനെയായിരുന്നു. കേസിൽ കാസർകോട് സ്വദേശികളായ സഹാദരങ്ങളാണ് അറസ്റ്റിലായത്. ഇടപാടു നടന്നുകഴിഞ്ഞാൽ പണം ഈ അക്കൗണ്ടിൽ നിന്ന് പിൻവലിക്കുകയോ മറ്റ് അക്കൗണ്ടുകളിലേക്ക് ട്രാൻസ്ഫർ ചെയ്യുകയോ ആണ് പതിവ്. അക്കൗണ്ടുകളിലേക്ക് കൊള്ളയടിക്കുന്ന പണം നിക്ഷേപിക്കുകയും ഇടപാടുകാർ പറയുന്ന അക്കൗണ്ടുകളിലേക്ക് മാറ്റുകയുമാണ് രീതി. നിശ്ചിത ശതമാനം ഇവർക്ക് പ്രതിഫലമായി നൽകും. മിക്ക ഓൺലൈൻ തട്ടിപ്പുകളും സംബന്ധിച്ച അന്വേഷണം ഈ പ്രൈമറി അക്കൗണ്ടുകളിൽ അവസാനിക്കും.

'വീട്ടിലിരുന്ന് സമ്പാദിക്കാം'

'വീട്ടിലിരുന്ന് സമ്പാദിക്കാം' എന്ന വാഗ്ദാനത്തിലൂടെയും തട്ടിപ്പ് ഏറുകയാണ്. വർക്ക് ഫ്രം ഹോം വ്യവസ്ഥയിൽ ജോലി എന്ന ആകർഷണത്തിൽ വീഴുന്നവരേറെയാണ്. പണം കൈക്കലാക്കിയാൽ പിന്നെ യാതൊരു വിവരവുമില്ല. കൂടുതൽ യുവതികളാണ് ഇതിന് ഇരയാകുന്നത്.



''പരിചയമില്ലാത്ത അക്കൗണ്ടുകളിൽ നിന്ന് വരുന്ന സന്ദേശങ്ങൾ അവഗണിക്കണം. ലിങ്കുകളിൽ ക്ലിക്ക് ചെയ്യരുത്. കൂടുതൽ ചങ്ങാത്തത്തിന് പോയാൽ തട്ടിപ്പ് സംഘം വലയിൽ വീഴ്ത്തും. അജ്ഞത മുതലെടുക്കുകയാണ് ഇവരുടെ രീതി.

സൈബർ പൊലീസ്

അറസ്റ്റിലായ അന്യജില്ലക്കാർ : 16