ഗായത്രിപ്പുഴയ്ക്ക് പുനർജനി

 ടൂറിസം പദ്ധതികളുമായി ആലത്തൂർ ഒരുങ്ങുന്നു

ആലത്തൂർ: കൺകുളിർക്കെ കണ്ടുനിൽക്കാൻ ഇനിയുമേറെയുണ്ട് ഗായത്രിപ്പുഴയുടെ തീരങ്ങളിൽ. ആ സൗന്ദര്യത്തെ തൊട്ടുണർത്താനും ഒപ്പം പുഴയുടെ സ്വാഭാവികത തിരിച്ചുപിടിക്കാനുമുള്ള വൻ പദ്ധതികളുമായി ആലത്തൂർ ഒരുങ്ങുകയാണ്. കൈയേറ്റങ്ങളിൽ നിന്ന് പുഴയെ വീണ്ടെടുത്ത് വിനോദസഞ്ചാരികളെ ആകർഷിക്കുന്ന തരത്തിൽ സുന്ദരമായ പുഴയോര ടൂറിസം പദ്ധതിക്കാണ് ഇവിടെ തുടക്കമിടുന്നത്. വെങ്ങന്നൂർ, വാലിപ്പറമ്പ്, എടാംപറമ്പ് മേഖലകളെ കേന്ദ്രീകരിച്ചാണ് പദ്ധതിയുടെ പ്രാരംഭ നടപടികൾക്ക് നിലവിൽ ജീവൻ വെച്ചിരിക്കുന്നത്.

പുഴയോര ടൂറിസം യാഥാർത്ഥ്യമാക്കുന്നതിന് മുന്നോടിയായി പുഴയുടെ അതിരുകൾ വ്യക്തമായി തിട്ടപ്പെടുത്തേണ്ടതുണ്ട്. ഇതിനായി താലൂക്ക് സർവേയറെ ചുമതലപ്പെടുത്തിക്കഴിഞ്ഞു. പുഴയോരങ്ങൾ അളന്നു തിട്ടപ്പെടുത്തി കാലങ്ങളായുള്ള കൈയേറ്റങ്ങൾ പൂർണ്ണമായും ഒഴിപ്പിക്കാനാണ് അധികൃതരുടെ തീരുമാനം. പുഴയുടെ സ്വാഭാവിക ഒഴുക്ക് വീണ്ടെടുക്കുന്നതിനൊപ്പം ഇരുകരകളും മനോഹരമായി മോടിപിടിപ്പിക്കും. ഇതുൾപ്പെടെ വൈവിധ്യമാർന്ന പദ്ധതികളാണ് അണിയറയിൽ ഒരുങ്ങുന്നത്. സന്ദർശകർക്ക് വിശ്രമിക്കാൻ പുഴയോരത്ത് മനോഹരമായ ഉദ്യാനം നിർമ്മിക്കും. ജലസമൃദ്ധമായ തടയണയ്ക്ക് സമീപമുള്ള പ്രദേശത്ത് ബോട്ടിംഗ് സ്റ്റേഷനും വിനോദസഞ്ചാരികൾക്കായി വിശ്രമകേന്ദ്രവും പണിയും. എൽ.ഡി.എഫ് ഭരണകാലത്ത് പദ്ധതിക്ക് തുടക്കം കുറിച്ചിരുന്നെങ്കിലും പിന്നീട് മുടങ്ങിപ്പോവുകയായിരുന്നു. ഇപ്പോൾ എം.എൽ.എ ഫണ്ട് കൂടി വിനിയോഗിച്ച് പദ്ധതി കൂടുതൽ ഊർജ്ജസ്വലമായി നടപ്പിലാക്കാനാണ് തീരുമാനം.

 വീഴുമലയിൽ ഇക്കോ ടൂറിസം
ഗായത്രിപ്പുഴയോര ടൂറിസത്തിന് പുറമേ പ്രദേശത്തെ മറ്റൊരു മനോഹര കേന്ദ്രമായ വീഴുമലയിൽ ഇക്കോ ടൂറിസം പദ്ധതി കൂടി നടപ്പിലാക്കാൻ പഞ്ചായത്ത് ഭരണസമിതി ആലോചിക്കുന്നുണ്ട്. ടൂറിസം വകുപ്പുമായി സഹകരിച്ച് ഇതിനായുള്ള കൃത്യമായ രൂപരേഖ തയ്യാറാക്കി വരികയാണ്. ഗായത്രിപ്പുഴയുടെ ഇരുകരകളും വീഴുമലയുടെ പച്ചപ്പും ഒരുമിപ്പിച്ച് ആലത്തൂരിനെ ഒരു പ്രധാന ടൂറിസം ഹബ്ബാക്കി മാറ്റാനുള്ള തയ്യാറെടുപ്പിലാണ് പഞ്ചായത്ത് അധികൃതർ. പദ്ധതി യാഥാർത്ഥ്യമാകുന്നതോടെ പ്രദേശവാസികൾക്ക് പുതിയ തൊഴിലവസരങ്ങൾ ലഭിക്കുമെന്ന പ്രതീക്ഷയുമുണ്ട്.