'വായനശാല മറന്നില്ല, വായിക്കാൻ പഠിപ്പിച്ചവരെ'

തൊടുപുഴ: അക്ഷരവെളിച്ചം നൽകി വായിക്കാൻ പഠിപ്പിച്ച ഗുരുനാഥർക്ക് ആദരവിന്റെ ദക്ഷിണ നൽകി വായനശാല. നടുക്കണ്ടം കെ.എസ്. കൃഷ്ണപിള്ള സ്മാരക വായനശാലയാണ് അദ്ധ്യാപകദിനത്തിൽ വിരമിച്ചവരും സർവ്വീസിൽ ഉള്ളവരുമായ അദ്ധ്യാപകർക്ക് ആദരവ് നൽകിയത്. വായനശാലയുടെ പരിസരപ്രദേശത്ത് താമസക്കാരായ 21 അദ്ധ്യാപകർ ആദരവ് ഏറ്റുവാങ്ങികൊണ്ട് മുൻകാല അനുഭവങ്ങൾ പങ്കുവച്ചു.
പരിപാടിയിൽ പങ്കെടുത്ത ഏറ്റവും സീനിയർ അദ്ധ്യാപകൻ 87 കാരനായ തോട്ടുങ്കൽപറമ്പിൽ റ്റി.ഒ. ഫിലിപ്പിനെ അദ്ദേഹത്തിന്റെ ശിഷ്യനായ റിട്ട. പ്രിൻസിപ്പാൾ യു.എൻ. പ്രകാശ് ആദരിച്ചത് വേറിട്ട അനുഭവമായി. വീടുകളിൽ വിശ്രമജീവിതം നയിക്കുന്നവർ പഴയ സഹപ്രവർത്തകരെ കണ്ടതോടെ അവരുടെ മനസിൽ ക്ലാസ്മുറികളുടെ ചിത്രം തെളിഞ്ഞു.
വായനശാലയുടെ ഈ വർഷത്തെ ഓണാഘോഷ-അധ്യാപകദിനാചരണ പരിപാടിയോടനുബന്ധിച്ച് നടത്തിയ അദ്ധ്യാപകസംഗമം നഗരസഭാ കൺസിലർ നിഷ സോമൻ ഉദ്ഘാടനം ചെയ്തു. കെ.ജെ. മാത്യു അദ്ധ്യക്ഷനായി. ലൈബ്രറി കൗൺസിൽ താലൂക്ക് സെക്രട്ടറി വി.വി. ഷാജി, യു.എൻ. പ്രകാശ്, എ.എൻ. ചന്ദ്രബാബു, കെ.എസ്. ശ്രീദേവി, കെ. രാമചന്ദ്രൻപിള്ള എന്നിവർ പ്രസംഗിച്ചു. അധ്യാപകരുടെ കലാപരിപാടികളും നടത്തി.