ചിറ്റൂരിൽ തുരുമ്പെടുത്ത് കാർഷിക യന്ത്രങ്ങൾ

ചിറ്റൂർ: ഗ്രാമ, ബ്ലോക്ക്, ജില്ല പഞ്ചായത്ത്, നെൽകൃഷിവികസന ഏജൻസി എന്നിവയിലൂടെ കൃഷിഭവൻ മുഖാന്തിരം പാടശേഖര സമിതികൾക്കു നൽകിയ കാർഷികോപകരണങ്ങൾ തുരുമ്പെടുത്ത് ഉപയോഗശൂന്യമായി കൊണ്ടിരിക്കുന്നു. ബ്ലോക്ക് പഞ്ചായത്തിൻ്റെ ഉടമസ്ഥതയിൽ അരണ്ടപ്പള്ളത്തെ കെട്ടിടത്തിനകത്തും പുറത്തും നിരവധി കാർഷികയന്ത്രങ്ങൾ വർഷങ്ങളായി ഉപയോഗിക്കാതെ കിടക്കുകയാണ്. ഗ്രാമ പഞ്ചായത്തിൻ്റെ അധീനതയിൽ ആലാങ്കടവിലുള്ള കെട്ടിടത്തിലും ലക്ഷങ്ങൾ വില പിടിപ്പുള്ള യന്ത്രങ്ങൾ തുരുമ്പെടുത്ത്ല മാറാലമൂടി കിടക്കുന്നുണ്ട്. വാങ്ങിയ ശേഷം ഒരുതവണപോലും ഉപയോഗിക്കാത്ത യന്ത്രങ്ങൾ വരെ വർഷങ്ങളായി ഇതിനകത്തുണ്ട് എന്നാണ് വിവരം. കൊയ്ത്ത് യന്ത്രം, മെതിയെന്ത്രം, നടീൽ യന്ത്രം, ട്രാക്ടർ, ടില്ലർ തുടങ്ങി നിരവധി യന്ത്രങ്ങൾ ഉണ്ട് ഇക്കൂട്ടത്തിൽ. ഇത്തരത്തിൽ കോടികളുടെ പൊതുമുതൽ വെറുതെ കിടന്നു നശിക്കുമ്പോൾ കൃഷി വകുപ്പോ കാർഷിക വികസന സമിതികളോ, പാടശേഖര സമിതികളോ ശ്രദ്ധിക്കുന്നുമില്ല. മാറി മാറി വരുന്ന പഞ്ചായത്ത് ഭരണസമിതികളും കൃഷി വകുപ്പ് ഉദ്യോഗസ്ഥരും ഇക്കാര്യം വേണ്ടത്ര ശ്രദ്ധിക്കുന്നില്ലെന്ന് കർഷകർ പറയുന്നു.

 യന്ത്രങ്ങൾ നന്നാക്കും

നല്ലേപ്പിള്ളി പഞ്ചായത്തിലെ വിവിധ ഭാഗങ്ങളിലായി ഉപയോഗശൂന്യമായി കിടക്കുന്ന കാർഷികോപകരണങ്ങളും യന്ത്രങ്ങളും നന്നാക്കി കർഷകർക്ക് നൽകാനുള്ള നടപടി പുരോഗമിക്കുകയാണെന്ന് കൃഷി ഓഫീസർ പറഞ്ഞു. ഇതിനായി മലമ്പുഴ കാർഷിക എൻജിനീയറിംഗ് വിഭാഗവുമായി ബന്ധപ്പെട്ടിട്ടുണ്ടെന്നും കൃഷി ഓഫീസർ സൂചിപ്പിച്ചു. അതേസമയം മാറി മാറി വരുന്ന ഭരണ സമിതിയും കൃഷി ഉദ്യോഗസ്ഥരും കാലങ്ങളായി പറഞ്ഞു കേൾക്കുന്ന പല്ലവി മാത്രമാണിതെന്നും പ്രയോഗത്തിൽ വരുത്താറില്ലെന്നും കർഷകർ പറയുന്നു. പതിറ്റാണ്ടുകളായി തുരുമ്പെടുത്തു കിടക്കുന്ന യന്ത്രങ്ങളും ഇക്കൂട്ടത്തിലുണ്ട്. പഞ്ചായത്ത് പദ്ധതി ആസൂത്രണഘട്ടത്തിൽ ഉല്പാദനമേഖലയിലേക്ക് നീക്കി വയ്ക്കുന്ന ഫണ്ട് ഉപയോഗിച്ച് റിപ്പയർ ചെയ്താൽ നിലവിലുള്ള യന്ത്രങ്ങൾ ഇനിയും 10 വർഷമെങ്കിലും പ്രവർത്തിപ്പിക്കാൻ കഴിയുമെന്നും കർഷകർ ചൂണ്ടിക്കാട്ടുന്നു.