ഓണ വിപണിയിൽ കർഷകർക്ക് നിരാശ: ബന്ദിക്കൃഷി വെള്ളപ്പൊക്കത്തിൽ നശിച്ചു

തിരുവല്ല : ഓണക്കാലത്ത് വിപണിയിലെത്തിക്കാനായി ലക്ഷ്യമിട്ട് പ്രതീക്ഷയോടെ ഒരുക്കിയ ബന്ദിക്കൃഷി വെള്ളപ്പൊക്കത്തിൽ നശിച്ചതോടെ കർഷകർക്ക് നഷ്ടവും നിരാശയും. എസ്.എൻ.ഡി.പി. യോഗം നെടുമ്പ്രം ശാഖയിലെ ഗുരുപൂജ പുരുഷ സ്വയം സഹായ സംഘത്തിന്റെ നേതൃത്വത്തിൽ കൃഷി വകുപ്പിന്റെ സഹായത്തോടെ 50 സെന്റ് സ്ഥലത്ത് നടത്തിയ ബന്ദിക്കൃഷിയാണ് വെള്ളം കയറി നശിച്ചത്. ഓണവിപണി ലക്ഷ്യമിട്ട് കഴിഞ്ഞ ജൂണിലാണ് കൃഷിയിറക്കിയത്. ഏകദേശം 2,000 ബന്ദിച്ചെടികളാണ് പരിപാലിച്ചിരുന്നത്. ഓണത്തിന് ദിവസങ്ങൾ മാത്രം ശേഷിക്കെ ചെടികൾ പൂവിടാൻ തുടങ്ങിയ സമയത്താണ് വെള്ളപ്പൊക്കം കൃഷിക്ക് തിരിച്ചടിയായത്. ഓറഞ്ച്, മഞ്ഞ നിറങ്ങളിലുള്ള ബന്ദിപ്പൂക്കൾ നിറഞ്ഞ് നിൽക്കേണ്ടിയിരുന്ന പാടത്ത് വെള്ളം കയറിയതോടെ എല്ലാം നശിച്ചു. ഓണക്കാലത്ത് ബന്ദിപ്പൂക്കൾക്ക് ലഭിക്കുന്ന മികച്ച വില മുന്നിൽക്കണ്ടായിരുന്നു സംഘത്തിന്റെ കൃഷി. സ്വന്തം അദ്ധ്വാനവും സമയവും ചെലവഴിച്ച് ഒരുക്കിയ കൃഷിയിൽനിന്ന് ഓണവിപണിയിലേക്ക് പൂക്കൾ എത്തിക്കാമെന്ന പ്രതീക്ഷയിലായിരുന്നു അംഗങ്ങൾ. എന്നാൽ വെള്ളപ്പൊക്കം ആ പ്രതീക്ഷകളെല്ലാം തകർത്തു. കൃഷിയിനത്തിൽ മാത്രം ഏകദേശം അരലക്ഷം രൂപയുടെ നഷ്ടം ഉണ്ടായതായാണ് കണക്കാക്കുന്നത്. കൃഷിക്കായി ചെലവഴിച്ച തുകയ്ക്ക് പുറമെ അംഗങ്ങളുടെ മാസങ്ങളായുള്ള അദ്ധ്വാനവും വെള്ളത്തിലായി. ഓണത്തിന് വീടുകളിലും പൂക്കളങ്ങളിലും നിറം പകരേണ്ടിയിരുന്ന ബന്ദിപ്പൂക്കൾ ഇത്തവണ പൂക്കാതെ പോയതിന്റെ വേദനയിലാണ് സംഘാംഗങ്ങൾ. കൂട്ടായ്മയിലൂടെ കൃഷിയെ വരുമാനമാർഗമാക്കാനുള്ള ശ്രമത്തിനാണ് വെള്ളപ്പൊക്കം അപ്രതീക്ഷിത തിരിച്ചടിയായത്. പ്രളയവും വെള്ളക്കെട്ടും കാർഷികമേഖലയെ നിരന്തരം ബാധിക്കുന്ന സാഹചര്യത്തിൽ ചെറുകിട കർഷകരെയും കൂട്ടായ്മകളെയും സംരക്ഷിക്കാൻ കൂടുതൽ സഹായവും ഇടപെടലുകളും ആവശ്യം ശക്തമാണ്.