അമ്മയാണ് അമലി​ന് ഊർജം, ഡിസ്കസി​ലും ഹാമറി​ലും സ്വർണനേട്ടം

കൊടുമൺ : പ്രതിസന്ധികളിൽ തളരാത്ത അങ്കണവാടി ടീച്ചറായ അമ്മയുടെ പോരാട്ട വീര്യം ഊർജമാക്കിയ കോഴഞ്ചേരി സെന്റ് തോമസിലെ പ്ലസ് വൺ വിദ്യാർത്ഥി അമൽ മനോജി​ന് ഇത്തവണയും സുവർണനേട്ടം. നാലു തവണയായി സംസ്ഥാന സ്കൂൾ കായിക മേളയിലെ മെഡൽ ജേതാവാണ് അമൽ. ഇത്തവണ കൊടുമണ്ണി​ൽ സീനിയർ ആൺകുട്ടികളുടെ ഡിസ്‌കസ് ത്രോയിലും ഹാമർ ത്രോയിലും സ്വർണ്ണ മെഡൽ നേടാനായി​. ഷോട്ട് പുട്ടിൽ വെങ്കലവും സ്വന്തമാക്കി​. കഴിഞ്ഞ 5 സംസ്ഥാന മേളയിലും വെള്ളി, വെങ്കലം മെഡലുകൾ അമൽ മനോജ്‌ നേടി​യി​രുന്നു. ഇത്തവണ സ്വർണ്ണ മെഡൽ നേട്ടമാണ് ലക്ഷ്യം. അമൽ രണ്ടാം ക്ലാസിൽ പഠിക്കുമ്പോഴാണ് പി​താവ് മനോജി​ന്റെ മരണം. അങ്കണവാടി ടീച്ചറായ അമ്മ അർച്ചനയുടെ ജീവിത പ്രാരാബ്ദങ്ങൾക്ക് പിന്നിലെ പോരാട്ടം കണ്ടാണ് അമൽ വളർന്നത്. ഭാവിയിൽ ഒളിമ്പിക്സ് മെഡൽ നേടി അമ്മയ്ക്ക് സമ്മാനിക്കുകയാണ് അമലിന്റെ ലക്ഷ്യം. അമന്യ മനോജ്‌ സഹോദരിയാണ്. എൻ.ജി.ശിവശങ്കർ പരിശീലനം നൽകുന്നു.