ഗ്രാമീണ യുവതീ-യുവാക്കൾക്കായി സൗജന്യ നൈപുണ്യ പരിശീലനവും തൊഴിലും; അപേക്ഷ ക്ഷണിച്ചു

തിരുവനന്തപുരം: കേന്ദ്ര-സംസ്ഥാന സർക്കാരുകളുടെ സംയുക്ത നൈപുണ്യ വികസന-ഉപജീവന പദ്ധതിയായ ദീൻ ദയാൽ ഉപാധ്യായ ഗ്രാമീൺ കൗശല്യ യോജന പ്രകാരം കേരളത്തിലെ അർഹരായ ഗ്രാമീണ യുവതീ-യുവാക്കൾക്കായി കുടുംബശ്രീ മിഷൻ സൗജന്യ തൊഴിലധിഷ്ഠിത നൈപുണ്യ പരിശീലന കോഴ്സുകളിലേക്ക് അപേക്ഷ ക്ഷണിച്ചു. സംസ്ഥാനത്തെ സർക്കാർ അംഗീകൃത പ്രോജക്ട് ഇംപ്ലിമെന്റേഷൻ ഏജൻസികൾ വഴി 2026 ഒക്ടോബർ- നവംബർ മാസത്തിൽ ആരംഭിക്കുന്ന പുതിയ ബാച്ചുകളിലേക്കാണ് പ്രവേശനം നടത്തുന്നത്.

ഗ്രാമീണ മേഖലയിലെ യുവജനങ്ങൾക്ക് സൗജന്യ നൈപുണ്യ പരിശീലനം നൽകി തൊഴിൽ ഉറപ്പാക്കുക എന്നതാണ് പദ്ധതിയുടെ ലക്ഷ്യം. പദ്ധതിയുടെ ഒന്നാം ഘട്ടത്തിൽ 56,665 പേർക്ക് സംസ്ഥാനത്തും വിദേശത്തുമായി തൊഴിൽ ലഭ്യമാക്കാൻ കുടുംബശ്രീക്ക് സാധിച്ചിരുന്നു. ഈ മികവിന്റെ തുടർച്ചയായാണ് രണ്ടാം ഘട്ടത്തിന് കേന്ദ്രാനുമതി ലഭിച്ചത്. 2027 ഡിസംബറിനുള്ളിൽ ആകെ 30,272 പേർക്ക് പരിശീലനവും തൊഴിലും ലഭ്യമാക്കാനാണ് കുടുംബശ്രീ ലക്ഷ്യമിടുന്നത്.

സൗജന്യ സേവനങ്ങളും പ്രത്യേകതകളുംപുറത്ത് 80,000 രൂപ മുതൽ 2 ലക്ഷം രൂപ വരെ ചെലവുവരുന്ന അത്യാധുനിക സാങ്കേതിക കോഴ്സുകളാണ് പൂർണ്ണമായും സൗജന്യമായി നൽകുന്നത്. പഠനം, ഭക്ഷണം, താമസം, യൂണിഫോം, പഠന സാമഗ്രികൾ എന്നിവ തികച്ചും സൗജന്യമാണ്. പരിശീലനം വിജയകരമായി പൂർത്തിയാക്കുന്ന ഉദ്യോഗാർത്ഥികൾക്ക് കേന്ദ്ര സർക്കാർ അംഗീകൃത 'സെക്ടർ സ്കിൽ കൗൺസിൽ' നൽകുന്ന സർട്ടിഫിക്കറ്റും കേരളത്തിലും ഇന്ത്യയിലെ മറ്റ് സംസ്ഥാനങ്ങളിലും വിദേശത്തും സൗജന്യ പ്ലേസ്മെന്റ് സപ്പോർട്ടും ലഭിക്കും. കേരളത്തിലെ ഏത് ജില്ലയിലെ സെന്ററിലേക്കും വിദ്യാർത്ഥികൾക്ക് അപേക്ഷിക്കാം.

ഹെൽത്ത്കെയർ, ഐ.ടി & ഐ.ടി.ഇ.എസ്, ടൂറിസം & ഹോസ്പിറ്റാലിറ്റി, എയ്റോസ്പേസ് & ഏവിയേഷൻ, ഇലക്ട്രോണിക്സ്, ലൊജിസ്റ്റിക്സ്, അപ്പാരൽ, ഇൻസ്ട്രുമെന്റേഷൻ & ഓട്ടോമേഷൻ, ബാങ്കിംഗ് & ഫിനാൻഷ്യൽ സർവീസസ് (BFSI), അയൺ ആൻഡ് സ്റ്റീൽ തുടങ്ങി തൊഴിൽ സാധ്യതയേറിയ 12-ലധികം പ്രമുഖ മേഖലകളിൽ 27-ലേറെ കോഴ്സുകളിലാണ് പ്രവേശനം ലഭിക്കുന്നത്.

പ്രധാന കോഴ്സുകൾ

1. ഐ.ടി & എ.ഐ: എ.ഐ ഡെവലപ്പർ, സൈബർ സെക്യൂരിറ്റി/സെക്യൂരിറ്റി അനലിസ്റ്റ്, ജൂനിയർ സോഫ്റ്റ്‌വെയർ ഡെവലപ്പർ, ഡിജിറ്റൽ മാർക്കറ്റിംഗ്.

2. ഏവിയേഷൻ & ഏറോസ്പേസ്: എയർലൈൻ കസ്റ്റമർ സർവീസ് എക്സിക്യൂട്ടീവ്.

3. ഹെൽത്ത്കെയർ: ജനറൽ ഡ്യൂട്ടി അസിസ്റ്റന്റ് (Trainee/Advanced), ഗെറിയാട്രിക് കെയർഗിവർ (Institutional & Home Care), പഞ്ചകർമ്മ അസിസ്റ്റന്റ്, ജനറൽ ഡ്യൂട്ടി എയ്ഡ്.

4. ഹോസ്പിറ്റാലിറ്റി & ടൂറിസം: ഗസ്റ്റ് സർവീസ് അസോസിയേറ്റ് (Front Office / Food & Beverage), ഡെമി ഷെഫ് ഡി പാർട്ടി, കോമിസ്, മൾട്ടി ടാസ്ക് അറ്റൻഡന്റ് (Facility Management).

5. ഇലക്ട്രോണിക്സ് & ഓട്ടോമേഷൻ: ബിൽഡിംഗ് ഓട്ടോമേഷൻ സ്പെഷ്യലിസ്റ്റ്, മൾട്ടി സ്കിൽ ടെക്നീഷ്യൻ (Consumer Durables), ഫീൽഡ് ടെക്നീഷ്യൻ കോംപ്യൂട്ടിംഗ് ആന്റ് പെരിഫെറൽസ്, വയറിംഗ് ഹാർനെസ് അസംബ്ലി ഓപ്പറേറ്റർ.

6. മറ്റു കോഴ്സുകൾ: വെൽഡർ (GTAW), അസിസ്റ്റന്റ് ഇലക്ട്രീഷ്യൻ, വേർഹൗസ് എക്സിക്യൂട്ടീവ് (Logistics), മൈക്രോ ഫിനാൻസ് എക്സിക്യൂട്ടീവ്, എക്സിക്യൂട്ടീവ് - സെക്രെട്ടറിയൽ സർവീസസ്, ഫാഷൻ ഡിസൈനർ / അസിസ്റ്റന്റ് ഡിസൈനർ (Apparel), ഇൻ-സ്റ്റോർ പ്രൊമോട്ടർ (Telecom).

യോഗ്യതയും പ്രായപരിധിയും

പ്രായപരിധി: 18 മുതൽ 35 വയസ്സ് വരെ (സ്ത്രീകൾ, ഭിന്നശേഷിക്കാർ [PWD], പട്ടികവർഗ്ഗം/PVTG വിഭാഗങ്ങളിൽപ്പെട്ടവർക്ക് 45 വയസ്സ് വരെ ഇളവുണ്ട്).

വിദ്യാഭ്യാസ യോഗ്യത: പത്താം ക്ലാസ് മുതൽ ഉയർന്ന വിദ്യാഭ്യാസ യോഗ്യതയുള്ളവർക്ക് അവരുടെ അഭിരുചിക്കനുസരിച്ച് കോഴ്സുകൾ തിരഞ്ഞെടുക്കാം.

അപേക്ഷിക്കേണ്ട വിധം

താല്പര്യമുള്ള ഉദ്യോഗാർത്ഥികൾ അടുത്തുള്ള കുടുംബശ്രീ സി.ഡി.എസ് (CDS) ഓഫീസുമായോ, ബ്ലോക്ക് പഞ്ചായത്ത് തലത്തിലുള്ള എസ്.ഐ.എസ്.ഡി - സ്കിൽസ് ബ്ലോക്ക് കോ-ഓർഡിനേറ്റർമാരുമായോ, ജില്ലാ കുടുംബശ്രീ മിഷൻ ഓഫീസുകളുമായോ നേരിട്ട് ബന്ധപ്പെടേണ്ടതാണ്. തിരുവനന്തപുരം കരമനയിൽ പ്രവർത്തിക്കുന്ന മൈഗ്രേഷൻ സപ്പോർട്ട് സെന്റർ (MSC) വഴി അഡ്മിഷന് വേണ്ട സൗജന്യ മാർഗ്ഗനിർദ്ദേശങ്ങൾ ലഭിക്കും.

സംസ്ഥാനത്ത് പ്രവർത്തിക്കുന്ന ഡി.ഡി.യു-ജി.കെ.വൈ മൈഗ്രേഷൻ സപ്പോർട്ട് സെന്ററുകളുമായി (MSC) ബന്ധപ്പെടാനുളള ഫോൺ നമ്പരുകൾ:

തിരുവനന്തപുരം: 0471-3586525

എറണാകുളം: 0484-2959595

തൃശ്ശൂർ: 0487-2962517

കോഴിക്കോട്: 0495-2766160

ഇ-മെയിൽ: ker.ddugky.msctvpm@gmail.com

ഡി.ഡി.യു-ജി.കെ.വൈ സെൻട്രലൈസ്ഡ് കോൾ സെന്റർ:

ടോൾ ഫ്രീ നമ്പർ: 1800 425 4714

(രണ്ടാം ശനി, ഞായർ, പൊതു അവധി ദിവസങ്ങൾ ഒഴികെ രാവിലെ 10.00 മണി മുതൽ വൈകിട്ട് 05.00 മണി വരെയാണ് ഡിഡിയു-ജികെവൈ സെൻട്രലൈസ്ഡ് കോൾ സെന്റർ പ്രവർത്തിക്കുന്നത്.)