വേനലിൽ വാടാതെ ബൊഗൈൻവില്ല

കിളിമാനൂർ: ഇത് ബൊഗൈൻ വില്ല കാലം. കൊടും വേനലിൽ ടറസിന്റെ മുകളിലും, മുറ്റത്തും നിറയെ പൂക്കളുമായി പുഞ്ചിരിതൂകി നിൽക്കുകയാണ് ബൊഗൈൻവില്ല. വ്യത്യസ്ത നിറങ്ങളിൽ പൂക്കളുമായി പൊള്ളുന്ന വെയിലിനെ ഗൗനിക്കാതെ തലയുയർത്തി നിൽക്കുന്നു.

വെറുമൊരു അലങ്കാരച്ചെടിയിൽ ഉപരിയായി ബോൺസായ് തയ്യാറാക്കാനും ഗ്രാഫ്റ്റ് ചെയ്ത് ഒരു ചെടിയിൽ പലതരം പൂക്കൾ ഒരുമിച്ചുണ്ടാകാനും ആകർഷകമായ ആകൃതിയിൽ രൂപപ്പെടുത്തിയെടുക്കാനും പറ്റുമെന്നതിനാൽ ഇവയ്ക്ക് നല്ല ഡിമാൻഡാണ്. അനാകർഷകമായ കുഞ്ഞൻ പൂക്കൾക്കു ചുറ്റുമുള്ള വർണ ഇലകളാണ് പൂങ്കുലയുടെ ഭംഗി.

കണ്ടു മടുത്ത പിങ്ക്,വെള്ള പൂക്കളുടെ സ്ഥാനത്ത് ഇളം നീല, മഞ്ഞ,ഓറഞ്ച്,ചുവപ്പ്,വൈലറ്റ് തുടങ്ങിയ നിറങ്ങളിലും വർണക്കൂട്ടുകളിലുമുള്ള പൂക്കളുണ്ടാകുന്ന ഇനങ്ങളും ലഭ്യമാണ്.

വളർത്താൻ എളുപ്പം

ബൊഗൈൻവില്ല ശേഖരണം ഹോബിയാക്കിയ പലരുമുണ്ട്. ലളിതമായ പരിചരണം,പൂക്കൾ ചെടിയിൽ ഏറെ നാൾ കൊഴിയാതെ നിൽക്കുന്ന പ്രകൃതം,വിപണിലഭ്യത എന്നിവയാണ് ഏവരെയും ആകർഷിക്കുന്നത്.

50 രൂപയ്ക്കു മുതൽ ലഭ്യമായ നാടൻ ഇനങ്ങൾ കൂടാതെ, 1000 രൂപ വരെ വിലയുള്ള നൂതന ഇനങ്ങളും വിപണിയിലുണ്ട്. പല വീട്ടമ്മമാരുടെയും വരുമാനമാർഗവുമാണ്.പൂക്കൾ 15 മുതൽ 20 ദിവസം വരെ ചെടിയിൽ കൊഴിയാതെ നിൽക്കും.