മുരുക്കുംപുഴ കടവിൽ ഉയരാതെ ബോട്ട് ജെട്ടി നിർമ്മാണം

ചിറയിൻകീഴ്: മുരുക്കുംപുഴ ബോട്ട് ജെട്ടിയുടെ നിർമ്മാണം പൂർത്തിയാക്കണമെന്നാവശ്യം ശക്തം.കോവളം - കാസർകോട് ജലഗതാഗത പാതയുടെ പ്രധാന ടെർമിനലായ മുരുക്കുംപുഴ കടവിൽ നിർമ്മിക്കുന്ന ബോട്ട് ജെട്ടിയുടെ പണിയാണ് പകുതി പോലും പൂർത്തിയാകാത്തത്.

അതിനാൽ ഓണത്തോടനുബന്ധിച്ച് ടൂറിസം ഡിപ്പാർട്ടുമെന്റ് നടത്താൻ പോകുന്ന വേളി - കഠിനംകുളം ബോട്ട് സർവീസ് മുരുക്കുംപുഴ കടവിൽ പ്രവേശിക്കാതെ കഠിനംകുളത്ത് വന്ന് തിരികെ പോകേണ്ട അവസ്ഥയിലാണ്.

ജെട്ടിക്കായി നിർമ്മിച്ച കെട്ടിടങ്ങൾ നിലവിൽ ഭാർഗവി നിലയം പോലെ അനാഥമായി കിടക്കുകയാണ്.

സ്ഥലം എം.എൽ.എയും വകുപ്പു മന്ത്രിയും ഈ വിഷയത്തിൽ അടിയന്തര ഇടപെട്ട് ബോട്ട് ജെട്ടി നിർമ്മാണം എത്രയും വേഗം പൂർത്തിയാക്കണമെന്ന് ഗാന്ധി പീസ് ഫൗണ്ടേഷൻ സെക്രട്ടറിയും ഗുരുദേവ ദർശന പഠനകേന്ദ്രം പ്രസിഡന്റുമായ മുരുക്കുംപുഴ സി.രാജേന്ദ്രനും സർവോദയ റസിഡന്റ്സ് അസോസിയേഷൻ സെക്രട്ടറി ജി.സുദർശനനും ആവശ്യപ്പെട്ടു.

പണി നിലച്ചിട്ട് - 2 വർഷം

ജെട്ടി നിർമ്മാണത്തോടനുബന്ധിച്ച് വെള്ളം കയറാതിരിക്കാൻ ബണ്ടു കെട്ടി ചെറുത്തിരിക്കുന്നതുമൂലം,മത്സ്യബന്ധന വള്ളങ്ങൾ പോലും കടവിൽ അടുപ്പിക്കാൻ കഴിയില്ല.ഇതോടെ മത്സ്യത്തൊഴിലാളികൾ ദുരിതത്തിലാണ്.ഇവിടെ കടത്തുവള്ളം പോലും നിലച്ചിരിക്കുകയാണ്.

ബോട്ട് ജെട്ടിയുടെ കോൺട്രാക്ടർ നിർമ്മാണ സാധനങ്ങൾ ഉൾപ്പെടെ ഇവിടെ നിന്ന് കൊണ്ടുപോയിട്ട് മാസങ്ങളായെന്ന് നാട്ടുകാർ പറയുന്നു

പ്രകൃതി സൗന്ദര്യം ആസ്വദിക്കാൻ നിരവധി പേരെത്തുന്ന കടവാണിത്

പദ്ധതിക്കായി മുടക്കിയത് കോടികൾ