ക്ഷേമനിധി ഓഫീസ് മാർച്ചും ധർണയും

തൃശൂർ: ഹെഡ് ലോഡ് ആൻഡ് ജനറൽ വർക്കേഴ്‌സ് യൂണിയൻ (സി.ഐ.ടി.യു.) ജില്ലാ കമ്മിറ്റിയുടെ നേതൃത്വത്തിൽ ക്ഷേമനിധി ഓഫീസ് മാർച്ചും ധർണയും നടത്തി. ചുമട്ട് തൊഴിലാളി ക്ഷേമനിധി ബോർഡിന്റെ പ്രവർത്തനം പുനഃസംഘടിപ്പിക്കുക, തൊഴിലാളികളുടെ ആനുകൂല്യ വിതരണത്തിലെ കാലതാമസം ഒഴിവാക്കുക, തൊഴിൽ സംരക്ഷണം ഉറപ്പുവരുത്തുക, ക്ഷേമനിധി ബോർഡ് ജീവനക്കാരുടെ അന്യായ സ്ഥലംമാറ്റങ്ങൾ അവസാനിപ്പിക്കുക, ക്ഷേമനിധി ബോർഡിലെ താത്കാലിക ജീവനക്കാരെ കൂട്ടത്തോടെ പിരിച്ചുവിടാനുള്ള തീരുമാനം ഉപേക്ഷിക്കുക തുടങ്ങിയ ആവശ്യങ്ങൾ ഉന്നയിച്ചാണ് ധർണ. കെ. കെ. രാമചന്ദ്രൻ എം.എൽ.എ. ഉദ്ഘാടനം ചെയ്തു. യൂണിയൻ ജില്ലാ വൈസ് പ്രസിഡന്റ് കെ. എ. ഗോപി അദ്ധ്യക്ഷനായി. കെ.ആർ.രവി , പി.ആർ. പ്രസാദ്, എം.എൻ. മുരളീധരൻ, എം.ആർ. കൃഷ്ണൻകുട്ടി, കെ.ഡി. ബെന്നി എന്നിവർ പ്രസംഗിച്ചു.