മൂന്ന് വർഷമായി യുഎഇയിലുള്ള പ്രവാസിയാണോ? അതിമനോഹരമായ മോണ്ടിനെഗ്രോ രാജ്യം കാണാൻ സുവർണാവസരം

അബുദാബി: മലയാളികൾ ഉൾപ്പെടെ ലക്ഷക്കണക്കിന് പ്രവാസികളുള്ള രാജ്യമാണ് യുഎഇ. തൊഴിൽ സുരക്ഷയും ഉയർന്ന ശമ്പളവും കാരണം ഇതിൽ പകുതിയിലേറെ പേരും കുടുംബമായാണ് താമസിക്കുന്നത്. ഇപ്പോഴിതാ യുഎഇയിലെ റെസിഡൻസ് വിസ കൈവശമുള്ളവർക്ക് ഒരു സന്തോഷവാർത്ത വന്നിരിക്കുകയാണ്. യുഎഇ റസിഡൻസ് വിസയുള്ളവർക്ക് വിസയില്ലാതെ മോണ്ടിനെഗ്രോ എന്ന യൂറോപ്യൻ രാജ്യം സന്ദർശിക്കാം. മോണ്ടിനെഗ്രോ സർക്കാർ പ്രഖ്യാപിച്ച താൽക്കാലിക ഇളവിന്റെ ഭാഗമായാണിത്.

ഒക്‌ടോബർ ഒന്ന് വരെയാണ് ഈ ഇളവ് ലഭ്യമാകുക. വിസയില്ലാതെ പത്ത് ദിവസം വരെ രാജ്യത്ത് താമസിക്കാനും കഴിയും. വിദേശ നിയമത്തിലെ ആർട്ടിക്കിൾ 14ലെ ഖണ്ഡിക രണ്ട് പ്രകാരമാണ് മോണ്ടിനെഗ്രോ സർക്കാരിന്റെ തീരുമാനം. മോണ്ടിനെഗ്രോയിൽ എത്തുന്നവർക്ക് കുറഞ്ഞത് മൂന്ന് വർഷമെങ്കിലും സജീവമായ സാധുവായ യുഎഇ റസിഡൻസ് വിസ ഉണ്ടായിരിക്കണം. നിങ്ങളുടെ പാസ്‌പോർട്ടും മറ്റ് രേഖകളും കൈവശം വയ്‌ക്കണം.

യുഎഇയിൽ നിന്ന് നേരിട്ട് മോണ്ടിനെഗ്രോയിലേക്ക് വിമാന സർവീസുണ്ട്. യുഎഇയിൽ നിന്ന് നേരിട്ട് മോണ്ടിനെഗ്രോയിലേക്ക് എത്തുന്നവർക്ക് മാത്രമാണ് ഈ വിസാ ഇളവ് ലഭിക്കുക. അഡ്രിയാറ്റിക് തീരം, ചരിത്രപരമായ പട്ടണങ്ങൾ, പർവത പ്രദേശങ്ങൾ തുടങ്ങി അതിമനോഹരമായ കാഴ്‌ചകളാണ് മോണ്ടിനെഗ്രോയിലുള്ളത്.