വിവാഹമോചനത്തിന് പിന്നാലെ കടുത്ത വിഷാദം; അഞ്ചാം നിലയിൽ നിന്ന് ചാടി യുവ ഡോക്ടർ ജീവനൊടുക്കി

ലക്‌നൗ: ഉത്തർപ്രദേശിലെ ഗാസിയാബാദിൽ 40 വയസുകാരിയായ മനോരോഗവിദഗ്ദ്ധ ഡോ.ഹേമിക അഗർവാൾ ആത്മഹത്യ ചെയ്തു. ഗാസിയാബാദിലെ രാജ് നഗർ എക്സ്റ്റൻഷനിലുള്ള അപ്പാർട്മെന്റിലെ അഞ്ചാം നിലയിൽ നിന്നും താഴേക്ക് വീണാണ് ഇവർ മരിച്ചത്. ഇന്നലെ വൈകുന്നേരമായിരുന്നു സംഭവം നടന്നത്.

ഗുരുതരമായി പരിക്കേറ്റ ഹേമികയെ സമീപവാസികൾ ഉടൻ സമീപത്തെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. വിവാഹബന്ധം അവസാനിപ്പിച്ചതിന് പിന്നാലെ മകളുടെ മാനസികാരോഗ്യം മോശമാവുകയായിരുന്നുവെന്ന് ഹേമികയുടെ പിതാവും ഗാസിയാബാദിലെ പ്രമുഖ മനോരോഗവിദഗ്ധനുമായ ഡോ. ആർ ചന്ദ്ര പറഞ്ഞു. വിവാഹമോചനത്തിന് പിന്നാലെ കഴിഞ്ഞ ഒന്നരവർഷമായി ഹേമിക കടുത്ത വിഷാദവും മാനസിക സംഘർഷവും അനുഭവിച്ചിരുന്നതായി കുടുംബം വ്യക്തമാക്കി.

സംഭവത്തിൽ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്. ആത്മഹത്യയ്ക്ക് പിന്നിലെ സാഹചര്യങ്ങൾ ഉൾപ്പെടെ വിശദമായി പരിശോധിച്ചുവരികയാണെന്ന് അധികൃതർ അറിയിച്ചു. കുടുംബാംഗങ്ങളുടെയും സമീപവാസികളുടെയും മൊഴികളും പൊലീസ് രേഖപ്പെടുത്തിയിട്ടുണ്ട്.