ടീം ഇന്ത്യയുടെ നാണംകെട്ട തോൽവി, ആദ്യത്തെ 'പണി' ഗംഭീറിന്? ഉത്തരം തേടി ബിസിസിഐ

ന്യൂഡൽഹി: ഇംഗ്ളണ്ടിനെതിരായ ട്വന്റി20 പരമ്പരയിൽ ഇന്ത്യയുടെ നാണംകെട്ട തോൽവിക്ക് പിന്നാലെ ടീമിന്റെ മുഖ്യ പരിശീലക സ്ഥാനത്തുള്ള ഗൗതം ഗംഭീറിന്റെ ഭാവി എന്താകുമെന്ന ചർച്ചകൾ സജീവമാകുന്നു. കഴിഞ്ഞ ട്വന്റി20 ലോകകപ്പ് ചാമ്പ്യൻമാരായ ഇന്ത്യൻ ടീമിന്റെ ഇപ്പോഴത്തെ മോശം പ്രകടനത്തിനെതിരെ ശക്തമായ പ്രതികരണങ്ങളാണ് ഉയരുന്നത്.

തോൽവിക്ക് പിന്നാലെ പരിശീലക സ്ഥാനത്തുനിന്ന് ഗംഭീറിനെ പുറത്താക്കാനുള്ള തീരുമാനം ബിസിസിഐ എടുക്കില്ലെന്നാണ് സൂചന. എന്നാൽ പരമ്പര പൂർത്തിയായതിന് ശേഷം ടീം അംഗങ്ങളുടെയും പരിശീലക സംഘത്തിന്റെയും പ്രകടനം വ്യക്തമായി വിലയിരുത്താനാണ് ബിസിസിഐയുടെ നീക്കം.

ഇംഗ്ളണ്ട് പരമ്പരയിലെ മോശം പ്രകടനവും അതിന് മുമ്പ് അയർലൻഡിനെതിരായ കനത്ത തോൽവിയുമടക്കം വിശദമായി പരിശോധിക്കാനാണ് ബിസിസിഐയുടെ തീരുമാനം. വിദേശ പിച്ചുകളിലെ ഇന്ത്യൻ ടീമിന്റെ തുടർച്ചയായ തോൽവി പരിശീലകനായ ഗൗതം ഗംഭീറിന് കടുത്ത സമ്മർദ്ദമാണ് നൽകുന്നത്. കൂടാതെ,​ ഇന്ത്യയുടെ പ്രകടനത്തെക്കുറിച്ച് ക്രിക്കറ്റ് വിദഗ്ധരും മുൻ താരങ്ങളും കടുത്ത വിമർശനമാണ് ഉന്നയിക്കുന്നത്.

അതേസമയം,​ നിലവിലെ ടീമിന്റെ മോശം പ്രകടനം യുവതാരങ്ങൾ കൂടുതലുള്ള ഒരു പുതിയ സംഘത്തെ വാർത്തെടുക്കുന്ന പ്രക്രിയയുടെ ഭാഗമാണെന്ന് ഗംഭീർ നേരത്തെ വ്യക്തമാക്കിയിരുന്നു. പുതിയ ക്യാപ്റ്റൻ,​ പുതിയ ഓപ്പണർമാർ,​ പരിചയ സമ്പന്നരായ താരങ്ങളുടെ അഭാവം എന്നിവ എടുത്തുപറഞ്ഞ അദ്ദേഹം ടീമിന് കുറച്ചുസമയം നൽകണമെന്നും ആവശ്യപ്പെട്ടിരുന്നു.