വീണ്ടും അശാന്തിയിലേക്കോ?​ പശ്ചിമേഷ്യയിൽ വീണ്ടും സംഘർഷ ഭീതി,​ മദ്ധ്യസ്ഥ ചർച്ചകൾ പാളുന്നു

ടെഹ്റാൻ: ഒരു ഇടവേളയ്ക്ക് ശേഷം പശ്ചിമേഷ്യയിൽ വീണ്ടും സംഘർഷ ഭീതി ശക്തമാകുന്നു. ഇറാനിൽ അമേരിക്കയുടെ ആക്രമണവും തുടർന്ന് ജോർദാനെ ഇറാൻ ആക്രമിച്ചതും വീണ്ടും യുദ്ധഭീതി സജീവമാക്കുകയാണ്. അനിശ്ചിതമായി നീളുന്ന സംഘർഷം അവസാനിപ്പിക്കാനും ഹോർമുസ്​ കടലിടുക്ക്​ തുറക്കാനും ലക്ഷ്യമിട്ട്​ നടക്കുന്ന അനുനയ ചർച്ചകൾക്കും പുതിയ നീക്കം തിരിച്ചടിയാകും.

ഒരു മാസ​ത്തോളമായി കാര്യമായി ആക്രമണങ്ങളൊന്നും മേഖലയിൽ നടന്നിരുന്നില്ല. അറബ്​ രാജ്യങ്ങൾ അടക്കമുള്ളവയുടെ നേതൃത്വത്തിൽ സംഘർഷം ഒഴിവാക്കാനും ഹോർമുസ്​ തുറക്കാനുമായി നടത്തിയ ചർച്ചകൾ അന്തിമ ഘട്ടത്തിലേക്ക്​ എത്തുന്ന സാഹചര്യത്തിൽ കൂടിയാണ് വീണ്ടും ആക്രമണവുമായി അമേരിക്ക രംഗത്തെത്തിയത്.

ഇറാനെതിരെ 2026 ഫെ​ബ്രുവരി 28ന്​ അമേരിക്കയും ഇസ്രായേലും ചേർന്ന്​ നടത്തിയ ആക്രമണത്തിന്​ ആറ്​ മാസം തികഞ്ഞ സമയത്താണ്​ ഇറാനിലെ ലാറക് ദ്വീപിന് നേരെ യുഎസ് വീണ്ടും ആക്രമണം നടത്തിയത്​. ആക്രമണത്തിൽ ഇറാൻ സൈനികരും സാധാരണക്കാരും ​കൊല്ലപ്പെട്ടിട്ടുണ്ട്​. ജോർദാനിലെ അമേരിക്കൻ താവളങ്ങളിലേക്ക്​ ബാലിസ്റ്റിക്​ മിസൈലുകൾ ഉപ​യോഗിച്ച് ഇറാനും തിരിച്ചടിച്ചു. ഞായറാഴ്ച അർദ്ധരാത്രിയും തിങ്കളാഴ്ച പുലർച്ചെയുമാണ് ആക്രമണങ്ങൾ നടന്നത്.

അമേരിക്കയുടെയും ഇറാന്റെയും ആക്രമണ പ്രത്യാക്രമണങ്ങളെത്തുടർന്ന് കനത്ത ആശങ്കയിലാണ് പശ്ചിമേഷ്യ. ഹോർമുസിന്റെ നിയന്ത്രണം കൈവശപ്പെടുത്തിയതായും കടലിൽ ഇറാൻ സ്ഥാപിച്ച മൈനുകൾ നീക്കം ചെയ്തതായും യുഎസ് പ്രസിഡന്റ്​ ഡൊണാൾഡ്​ ട്രംപ്​ നേരത്തേ അവകാശവാദം ഉന്നയിച്ചിരുന്നു. എന്നാൽ ഇത് തെറ്റാണെന്ന് ഹോർമുസിലൂടെയുള്ള കപ്പൽ നീക്ക രേഖകൾ വ്യക്​തമാക്കിയിരുന്നു.

പ്രതിദിനം 120-130 കപ്പലുകൾ സഞ്ചരിച്ചിരുന്ന സ്ഥാനത്ത്​ ഇപ്പോൾ അഞ്ചിൽ താഴെ കപ്പലുകളാണ്​ ഹോർമുസ്​ കടക്കുന്നത്​. ഇറാന്റെ അനുമതിയോടെ മാത്രമാണ് ചരക്കുനീക്കം നടക്കുന്നതെന്നാണ് റിപ്പോർട്ട്. ഈ സാഹചര്യത്തിൽ കൂടിയാണ്​ ഹോർമുസിന്​ സമീപത്തുള്ള ലാറക്​ ദ്വീപ്​ ലക്ഷ്യമാക്കി അ​മേരിക്ക ആക്രമണം നടത്തിയത്​. സാധാരണ ഇറാൻ ഗൾഫ്​ രാഷ്ട്രങ്ങളിലെ അമേരിക്കൻ കേ​ന്ദ്രങ്ങളെയാണ്​ ആക്രമണത്തിനായി ലക്ഷ്യമിടുന്നത്. എന്നാൽ, ഗൾഫ്​ രാജ്യങ്ങളുമായുള്ള ബന്ധം ഇനിയും വഷളാക്കാൻ താല്പര്യമില്ലാത്തതിനാലാകാം ജോ‌ർദാനിലേക്ക് ആക്രമണം നടത്തിയതെന്നാണ്​ സൂചന.