സിലിണ്ടർ ക്ഷാമം അനാഥാലയങ്ങളെയും ബാധിക്കുന്നു

കൊടുമൺ: ഗ്യാസ് സിലിണ്ടർ ക്ഷാമം അനാഥാലയങ്ങളുടെ പ്രവർത്തനത്തെയും ബാധിക്കുന്നു. അടൂർ താലൂക്കിൽ നാനൂറോളം അനാഥർ പാർക്കുന്ന മഹാത്മ ജനസേവന കേന്ദ്രത്തിൽ സിലിണ്ടർ ക്ഷാമം പ്രതിസന്ധിയുണ്ടാക്കുന്നു. ഭക്ഷണം പാകം ചെയ്യാൻ വിറക് അടുപ്പിനും ക്ഷാമമാണ്. രോഗികൾ ഏറെയുള്ള മഹാത്മയിൽ രോഗികൾക്കും മറ്റും നാലുനേരം ഭക്ഷണം നൽകണം. സിലിണ്ടർ തീരുന്നതനുസരിച്ച് പകരം കിട്ടുന്നത് താമസിച്ചാണ്. വാണിജ്യ സിലിണ്ടറുകൾക്ക് നിയന്ത്രണം ഏർപ്പെടുത്തിയത് അനാഥാലയങ്ങൾക്കും ബാധകമാക്കിയെന്നാണ് പരാതി. സിലിണ്ടറിന് ബുക്ക് ചെയ്ത ശേഷം കിട്ടാതെ വരുമ്പോൾ ഗ്യാസ് ഏജൻസികളിൽ വിളിച്ചാൽ വ്യക്തമായ മറുപടിയില്ല. സിലിണ്ടർ സ്റ്റോക്കില്ലെന്നും എത്തുമ്പോൾ തരാമെന്നും പറഞ്ഞ് കയ്യാെഴിയുകയാണ്.