പി.രവിവർമ്മ സ്മാരക പുരസ്​കാരം ഡോ.മിത്ര സതീഷിന്

പന്തളം: എഴുത്തുകാരനും സഞ്ചാരിയും പി.ആർ.ഡി ഡെപ്യൂട്ടി ഡയറക്ടറുമായിരുന്ന പന്തളം കൊട്ടാരം കുടുംബാംഗം പി.രവിവർമ്മയുടെ സ്മരണാർത്ഥം പന്തളം പാലസ് വെൽഫെയർ സൊസൈറ്റി ഏർപ്പെടുത്തിയ പി.രവിവർമ്മ സ്മാരക പുരസ്​കാരം സഞ്ചാരിയും എഴുത്തുകാരിയുമായ ഡോ.മിത്ര സതീഷിന്റെ 'സോളോ മംഗോളിയ' എന്ന പുസ്തകത്തിന് ലഭിച്ചു.

25000 രൂപയും ശിൽപവും പ്രശസ്തി പത്രവും അടങ്ങുന്നതാണ് പുരസ്​കാരം. എഴുത്തുകാരായ കെ.ബി.പ്രസന്നകുമാർ, ഒ.കെ.ജോണി, സുഭാഷ് വലവൂർ എന്നിവരടങ്ങിയ സമിതിയാണ് പുസ്തകം തിരഞ്ഞെടുത്തത്. ആലപ്പുഴ സ്വദേശിനിയായ ഡോ.മിത്ര സതീ​ഷ് , ഉടുമ്പൻചോല ഗവ.ആയൂർവേദ കോളേജിൽ അസിസ്റ്റന്റ് പ്രൊഫസറാ​ണ്. 25​ന് വൈകിട്ട് 4.30​ന് പന്തളം പാലസ് വെൽഫെയർ സൊസൈറ്റി ഹാളിൽ നടക്കുന്ന സമ്മേളനത്തിൽ പ്രശസ്ത കാലിഗ്രാഫർ നാരായണ ഭട്ടതിരി പുരസ്​കാര സമർപ്പണം നടത്തും.

അഡ്വ.സി.വി.ശാന്തകുമാർ എം.എൽ.എ സമ്മേളനം ഉദ്ഘാടനം ചെയ്യും. എഴുത്തുകാരിയും പി.ആർ.ഡി മുൻ അഡീഷണൽ ഡയറക്ടറുമായ സുധക്കുട്ടി പുസ്തകം പരിചയപ്പെടുത്തും. എഴുത്തുകാരായ കെ.ബി.പ്രസന്നകുമാർ, രവിവർമ തമ്പുരാൻ, സുഭാഷ് വലവൂർ എന്നിവർ പ്രസംഗിക്കും.