ചെറുകിട സംരംഭകർ നികുതി റിട്ടേൺ 31നകം സമർപ്പിക്കണം

തിരുവനന്തപുരം: നികുതി ഓഡിറ്റ് ബാധകമല്ലാത്ത ചെറുകിട ബിസിനസുകാർ, ഫ്രീലാൻസർമാർ, പ്രൊഫഷണലുകൾ എന്നിവർക്ക് 2026–27 അസസ്‌മെന്റ് വർഷത്തേക്കുള്ള ആദായ നികുതി റിട്ടേൺ സമർപ്പിക്കാനുള്ള സമയപരിധി ആഗസ്റ്റ് 31ന് അവസാനിക്കും.

ഇത്തവണ വിവിധ വിഭാഗം നികുതിദായകർക്ക് വ്യത്യസ്ത സമയപരിധി നിശ്ചയിച്ചതിനാലാണ് ചെറുകിട സംരംഭകർക്ക് അധിക സമയം ലഭിച്ചത്. ശമ്പള വരുമാനക്കാർക്കുള്ള റിട്ടേൺ സമർപ്പിക്കാനുള്ള സമയപരിധി ജൂലായ് 31ന് അവസാനിച്ചിരുന്നു.

നികുതി ഓഡിറ്റ് നിർബന്ധമായുള്ള ബിസിനസുകൾക്കും സ്ഥാപനങ്ങൾക്കും റിട്ടേൺ സമർപ്പിക്കാനുള്ള അവസാന തീയതി ഒക്‌ടോബർ 31ന് ആണ്. അന്താരാഷ്ട്ര ഇടപാടുകളുള്ളതും ട്രാൻസ്‌ഫർ പ്രൈസിംഗ് ചട്ടങ്ങൾ ബാധകമായതുമായ സ്ഥാപനങ്ങൾക്ക് നവംബർ 30 വരെയും സമയമുണ്ട്.

ആഗസ്റ്റ് 31നകം റിട്ടേൺ സമർപ്പിക്കാൻ കഴിയാത്തവർക്ക് ഡിസംബർ 31 വരെ വൈകിയ റിട്ടേൺ സമർപ്പിക്കാം. വാർഷിക മൊത്തവരുമാനം അഞ്ച് ലക്ഷം രൂപയിൽ കവിയാത്തവർക്ക് വൈകിയ റിട്ടേൺ സമർപ്പിക്കുന്നതിനുള്ള ഫീസ് 1,000 രൂപയും അഞ്ച് ലക്ഷം രൂപയിൽ കൂടുതലുള്ളവർക്ക് 5,000 രൂപയുമാണ്. നികുതി കുടിശികയുണ്ടെങ്കിൽ അതിന് ബാധകമായ പലിശയും നൽകേണ്ടിവരും.

സമർപ്പിച്ച റിട്ടേണിൽ തെറ്റുകളോ ഒഴിവാക്കലുകളോ ഉണ്ടായാൽ 2027 മാർച്ച് 31 വരെ പുതുക്കിയ റിട്ടേൺ സമർപ്പിക്കാം. അതിനാൽ അവസാന ദിവസത്തെ തിരക്ക് ഒഴിവാക്കി ആവശ്യമായ രേഖകൾ തയ്യാറാക്കി സമയപരിധിക്കുള്ളിൽ റിട്ടേൺ സമർപ്പിക്കുന്നതാണ് ഉചിതം.