ലണ്ടൻ: യുകെയിലെ ശ്രീനാരായണ ഗുരു മിഷൻ സംഘടിപ്പിക്കുന്ന ഗുരുജയന്തി ആഘോഷം ഈ വർഷം സെപ്‌തംബർ ഏഴിന് നടക്കും. ഓണാഘോഷങ്ങളും ഇതോടൊപ്പം ഉണ്ടാകും. ഈ പരിപാടിയിൽ ശ്രീനാരായണഗുരു മിഷൻ അംഗങ്ങൾക്ക് മാത്രമല്ല, സമൂഹത്തിലെ എല്ലാ വിഭാഗത്തിൽപ്പെട്ടവർക്കും സൗജന്യമായി പങ്കെടുക്കാവുന്നതാണ്.

സെപ്‌തംബർ ഏഴിന് ബാർക്കിംഗിലെ ഈസ്റ്റ്‌ബറി സ്‌കൂളിൽ വച്ച് വൈകിട്ട് മൂന്ന് മണിക്കാണ് ഗുരു ജയന്തി ആഘോഷം നടക്കുക. വിജയകുമാർ പിള്ള തിരക്കഥയെഴുതി സംവിധാനം ചെയ്ത ‘ആത്മരൂപൻ’ എന്ന നാടകം ആണ് ഈ വർഷത്തെ പ്രധാന പരിപാടി. കുമാരനാശാന്റെ 'ലീല' എന്ന കവിതയെ ആസ്പദമാക്കിയാണ് നാടകം. കൂടാതെ, പ്രധാന ഗായകരായ രാജേഷ് രാമനും മകൾ ലക്ഷ്മി രാമനും ചേർന്ന് നവധാരയുടെ നേതൃത്വത്തിൽ സംഗീത പരിപാടിയും അവതരിപ്പിക്കും.

കേരളത്തിലെയും യുകെയിലെയും പ്രശസ്തരായ പ്രഭാഷകർ ഗുരുവിന്റെ ഉപദേശങ്ങളെക്കുറിച്ചുള്ള ദാർശനിക പ്രഭാഷണങ്ങൾ നടത്തും. കൂടാതെ ഡാർലിവിഷൻ പ്രൊഡക്ഷൻസ് സംഘടിപ്പിക്കുന്ന ചെറുകഥ രചനാ മത്സരവും നടക്കും. ആ മത്സരത്തിൽ പങ്കെടുക്കുന്നവരുടെ പേരുകൾ നൽകേണ്ട അവസാന തീയതി ഓഗസ്റ്റ് 15 ആണ്.

സെപ്തംബർ 22ന് എസ്എൻജിഎം ഹാൾ ഈസ്റ്റ്ഹാമിലും ഓഗസ്റ്റ് 31ന് ക്രോയ്ഡൺ സെന്ററിലും ഓണസദ്യ വിളമ്പും. നമ്മുടെ വിദ്യാഭ്യാസ കേന്ദ്രത്തിലെ മികച്ച വിദ്യാർത്ഥികൾക്കായി മറ്റ് വൈവിധ്യമാർന്ന സാംസ്കാരിക വിനോദങ്ങളും സമ്മാന വിതരണവും ഉണ്ടായിരിക്കും.