കുടവൂരിൽ സാമൂഹ്യ വിരുദ്ധശല്യം രൂക്ഷമെന്ന് പരാതി, രാപകലില്ലാതെ മദ്യപാനം

കല്ലമ്പലം: കുടവൂർ മേഖലയിൽ സാമൂഹ്യ വിരുദ്ധശല്യം രൂക്ഷമെന്ന് പരാതി. രാപകലില്ലാതെ പരസ്യ മദ്യപാനം,അനധികൃത മദ്യ വില്പന കൂടാതെ പുകയില ഉത്പന്നങ്ങൾ,കഞ്ചാവ്,എം.ഡി.എം.എ തുടങ്ങിയ മാരക മയക്കുമരുന്നുകളുടെ ഉപയോഗവും വില്പനയും കുടവൂർ മേഖലയിൽ തകൃതിയായി നടക്കുന്നെന്നാണ് പരാതി. സീമന്തപുരം,വഞ്ചിമുക്ക്,വൈ.എം.എ, ഞാറയിൽക്കോണം - കുടവൂർ റോഡ്‌,ചേങ്കോട്ട്കോണം,വെടയത്ത് കുളം,പത്തനാപുരം,ലക്ഷംവീട് കോളനി തുടങ്ങിയ സ്ഥലങ്ങൾ കേന്ദ്രീകരിച്ചാണ് മദ്യത്തിന്റെയും മയക്കുമരുന്നിന്റെയും ഉപയോഗവും വില്പനയും.

കല്ലമ്പലം,പള്ളിക്കൽ പൊലീസ് സ്റ്റേഷൻ പരിധിയിലാണ് മിക്കസ്ഥലങ്ങളും. ആത്മഹത്യയോ അപകട മരണങ്ങളോ നടക്കുമ്പോൾ മാത്രമാണ് ഈ പ്രദേശത്ത്‌ പൊലീസെത്തുന്നത്. എക്സൈസും ഈ ഭാഗത്തേക്ക് വരാറില്ല. സർക്കാരിന്റെ തൂഫാനും ഇവിടെ ബാധിച്ചിട്ടില്ല. കഴിഞ്ഞ ദിവസം കുടവൂർ മോഹനന്റെ ചായക്കടയിൽ സാമൂഹ്യ വിരുദ്ധർ അതിക്രമിച്ചുകയറി പെട്ടിയിൽ സൂക്ഷിച്ചിരുന്ന നാണയ തുട്ടുകളും, 30 കെട്ടു ബീഡിയും,ത്രാസും എടുത്തുകൊണ്ടുപോയെന്നാണ് പരാതി.