ഗ്യാനേഷിന് എതിരെയുള്ളത് എട്ടോളം വിജിലൻസ് കേസുമായി ബന്ധപ്പെട്ട അന്വേഷണം: ചെന്നിത്തല

തിരുവനന്തപുരം: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരായുള്ളത് എട്ടോളം വിജിലൻസ് കേസുമായി ബന്ധപ്പെട്ട അന്വേഷണമാണെന്ന് ആഭ്യന്തര മന്ത്രി രമേശ് ചെന്നിത്തല നിയമസഭയിൽ പറഞ്ഞു. വസ്തുതകളും ഫയലുകളും പരിശോധിച്ച ശേഷം തുടർനടപടികളെടുക്കും.

കെ.എസ്.ടി.പി പദ്ധതിയിലെ കരാർ കമ്പനികൾക്ക് എസ്റ്റിമേറ്റ് തുകയേക്കാൾ കൂടുതൽ തുകയിൽ കരാറുകൾ അനുവദിച്ചതിലൂടെ സർക്കാരിന് 700 കോടി രൂപയുടെ നഷ്ടമുണ്ടാക്കിയെന്ന ആരോപണത്തിൽ ഗ്യാനേഷിനെതിരേ അന്വേഷണമുണ്ടായിരുന്നു.

2003-2006 കാലയളവിൽ പൊതുമരാമത്ത് വകുപ്പിന്റെ 76 നിർമ്മാണ പ്രവർത്തനങ്ങൾക്ക് ടെൻഡർ നടപടികൾ സ്വീകരിച്ചില്ലെന്ന് കണ്ടെത്തി അഞ്ചു കേസെടുത്തിരുന്നു. പിന്നീട് മൂന്നു കേസുകൂടിയെടുത്തു. ഇതെല്ലാം പിന്നീട് അവസാനിപ്പിച്ചു. ഇത് കോടതിയും അംഗീകരിച്ചു. വിജിലൻസ് അന്വേഷണം വേണ്ട രീതിയിൽ നടന്നിട്ടില്ലെന്ന പുതിയ പരാതിയാണ് ഇപ്പോൾ വിജിലൻസിന് കൈമാറിയതെന്നും എ.കെ.എം. അഷറഫിന്റെ സബ്മിഷന് മന്ത്രി മറുപടി നൽകി. കെ.എസ്.ടി.പി റോഡ് വികസന പദ്ധതിയിൽ ഗുരുതരമായ അഴിമതി ആരോപണങ്ങളാണ് അന്ന് മരാമത്ത് സെക്രട്ടറിയായിരുന്ന ഗ്യാനേഷ് കുമാറിനെതിരെ ഉയർന്നതെന്ന് അഷറഫ് ചൂണ്ടിക്കാട്ടി.