രമ്യഹരിദാസ് ഇന്ന് അന്വേഷണ സമിതിക്ക് മുന്നിലെത്തിയേക്കും

തിരുവനന്തപുരം: ചിറയിൻകീഴ് കൈയാങ്കളി വിവാദത്തെക്കുറിച്ച് അന്വേഷിക്കുന്ന മൂന്നംഗ സമിതിക്ക് മുമ്പാകെ രമ്യ ഹരിദാസ് എം.എൽ.എ ഇന്ന് എത്തിയേക്കും. പാർട്ടിക്ക് വഴങ്ങി വിഷയം ഒത്തുതീർപ്പിലെത്തിക്കണമെന്ന മുതിർന്ന നേതാക്കളുടെ ഉപദേശത്തോടെയാണ് രമ്യ അയഞ്ഞത്. പാർട്ടി സസ്പെൻഡ് ചെയ്ത പാളയം പ്രദീപിനെ പേഴ്സണൽ അസിസ്റ്റന്റ് ആക്കാനുള്ള നീക്കത്തിൽ നിന്നും രമ്യ പിന്മാറി.

ഇന്നലെ നിയമസഭാ സെക്രട്ടറിക്ക് ഇതുസംബന്ധിച്ച കത്ത് നൽകുമെന്ന് കേട്ടിരുന്നെങ്കിലും നൽകിയില്ല. നാളെ കെ.പി.സി.സി നേതൃയോഗം ചേരുകയാണ്. അതിന് മുമ്പായി അന്വേഷണസമിതിക്ക് മുമ്പാകെ എത്തണമെന്നാണ് ഹസൻ നിർദ്ദേശിച്ചിട്ടുള്ളത്. കൈയാങ്കളി നടന്ന വീടിന്റെ ഉടമസ്ഥൻ സജാദിനെയും പാളയം പ്രദീപിനെയും കെ.പി.സി.സി പ്രസിഡന്റ് സണ്ണിജോസഫ് സസ്പെൻഡ് ചെയ്തിരുന്നു. സസ്പെൻഡ് ചെയ്തയാളെ പേഴ്സണൽ സ്റ്റാഫിൽ ഉൾപ്പെടുത്താൻ രമ്യ ശ്രമിച്ചതിൽ സ്പീക്കർ തിരുവഞ്ചൂർ രാധാകൃഷ്ണൻ അതൃപ്തി പ്രകടിപ്പിച്ചിരുന്നു.

കത്ത് നൽകാൻ ശ്രമിച്ചത് നല്ല നടപടിയായില്ലെന്ന് കെ.പി.സി.സി പ്രസിഡന്റ് സണ്ണിജോസഫും പ്രതികരിച്ചിരുന്നു. ആരായാലും പാർട്ടിക്ക് വിധേയമായി പ്രവർത്തിക്കണമെന്നാണ് മന്ത്രി കെ.മുരളീധരൻ പറഞ്ഞത്. രമ്യയ്ക്കെതിരെ അച്ചടക്ക നടപടി വന്നേക്കില്ലെന്നാണ് സൂചന.