ഡി.വൈ.എഫ്.ഐ മാർച്ചിൽ സംഘർഷം

ആലപ്പുഴ: മദ്യമാഫിയകൾക്ക്​ ലാഭമുണ്ടാക്കാൻ ഇളവ്​ പ്രഖ്യാപിച്ച യു.ഡി.എഫ്​ തീരുമാനത്തിനെതിരെ ഡി.വൈ.എഫ്​.ഐ ആലപ്പുഴ ജില്ലാകമ്മിറ്റിയുടെ നേതൃത്വത്തിൽ കളക്​ടറേറ്റിലേക്ക്​ നടത്തിയ മാർച്ചിൽ സംഘർഷം. പൊലീസുമായുള്ള ബലപ്രയോഗത്തിനിടെ ബാരിക്കേഡിനിടയിൽ​പ്പെട്ട്​ ഡി.വൈ.എഫ്​.ഐ ജില്ലനേതാവിന്റെ കൈവിരലിന്​ ഗുരുതരപരിക്കേറ്റു. ജില്ലകമ്മിറ്റിയംഗവും കായംകുളം സ്വദേശിയുമായ സന്ദീപ്​ പാലശ്ശേരിക്കാണ്​ പരിക്കേറ്റത്​. വിദഗ്​ദ്ധചികിത്സക്കായി എറണാകുളത്തെ സ്വകാര്യആശുപത്രിയിലേക്ക്​ മാറ്റി. രണ്ടുമണിക്കൂർ നീണ്ടുനിന്ന പ്രതിഷേധത്തിനിടെ ബാരിക്കേഡുകൾ മറിച്ചിടാനുള്ള ശ്രമത്തിനിടെ കയർ വലിച്ചുകെട്ടിയിരുന്ന വൈദ്യൂതി പോസ്റ്റ്​ ആടിയുലഞ്ഞു. കളക്ടറേറ്റ്​ പ്രധാനഗേറ്റിന്​ എതിർവ​ശത്തെ വൈദ്യുതിപോസ്റ്റിന്റ് ചുവടുഭാഗം ഒടിഞ്ഞ്​ അപകടാവസ്ഥയിലായി.
ഇന്നലെ രാവിലെ 11.30ന്​ ഇ.എം.എസ്​ സ്​റ്റേഡിയത്തിൽനിന്ന്​ പ്രകടനമായി ഡി.വൈ.എഫ്.ഐ പ്രവർത്തകർ കളക്​ടേറേറ്റിന്​ മുന്നിലെത്തിയപ്പോൾ ബാരിക്കേഡ്​ ഉയർത്തി പൊലീസ്​ തടഞ്ഞു. ഇതിന്​ പിന്നാ​ലെ പ്രവർത്തകർ ബാരിക്കേഡുകൾ മറിച്ചിടാൻ പലതവണശ്രമിച്ചു.വ ചിലർ മതിൽചാടി കളക്ടറേറ്റ്​ വളപ്പിലേക്ക്​ കടന്നത്​ നേരിയ സംഘർഷത്തിനും തർക്കത്തിനുമിടയാക്കി. കൂടുതൽ പ്രവർത്തകർ മതിൽചാടി അകത്ത്​ കടന്നതോടെ പൊലീസും കാഴ്ചക്കാരായി. ഇതിനിടെ, പ്രവർത്തകർക്കെതിരെ ബലപ്രയോഗം നടത്തിയ പൊലീസുകാരൻ മദ്യലഹരിയിലായിരുന്നെന്ന് ചൂണ്ടിക്കാട്ടി തർക്കമുണ്ടായി. ര​ണ്ട്​ ബാരിക്കേഡുകൾ മറിച്ചിട്ട്​ പൊലീസ്​ വലയം ഭേദിച്ചതോടെ പ്രവർത്തകരെ അറസ്​റ്റ്​ ചെയ്തുനീക്കി.
ഡി.വൈ.എഫ്​.ഐ ജില്ലസെക്രട്ടറി ജയിംസ്​ ശാമുവേൽ ഉദ്​ഘാടനം നിർവഹിച്ചു. ജില്ലാ പ്രസിഡന്റ് എസ്.സുരേഷ്‍കുമാർ അദ്ധ്യക്ഷത വഹിച്ചു. സംസ്ഥാന കമ്മിറ്റി അംഗം സി.ശ്യാംകുമാർ, നേതാക്കളായ ദിനൂപ് വേണു, അജ്‍മൽ ഹസൻ, വി.കെ.സൂരജ്, പി.എ.അൻവർ, അനുപമ സൈജു, ജെ.മിനീസ, അനുപ്രിയ ദിനൂപ്, പി.എ.അഖിൽ, എ.എ.അക്ഷയ്, എസ്.മുകുന്ദ്, കെ.ആർ.രാംജിത് എന്നിവർ നേതൃത്വം നൽകി.