കഞ്ചാവ് കടത്തൽ : പ്രതിയ്ക്ക് മൂന്ന് വർഷം കഠിന തടവ്

കോട്ടയം : കഞ്ചാവ് കടത്തികൊണ്ട് വന്ന കേസിൽ പ്രതിക്ക് മൂന്നു വർഷം കഠിനതടവും 25,000 രൂപ പിഴയും ശിക്ഷ വിധിച്ചു. കാഞ്ഞിരപ്പള്ളി ആനക്കല്ല് പിണ്ടിയോക്കരയിൽ വിഷ്ണു (25) നെയാണ് തൊടുപുഴ എൻ.ഡി.പി.എസ് സ്‌പെഷ്യൽ കോടതി ജഡ്ജി കെ.എൻ ഹരികുമാർ ശിക്ഷിച്ചത്. പിഴ അടച്ചില്ലെങ്കിൽ മൂന്നു മാസം കൂടി കഠിനതടവ് അനുഭവിക്കണം. 2018 മാർച്ച് 21 ന് പൊൻകുന്നം ചെമ്പൂപ്പാറ ഭാഗത്തുള്ള കാത്തിരിപ്പ് കേന്ദ്രത്തിൽ നിന്നാണ് 1.150 കിലോഗ്രാം കഞ്ചാവുമായി ഇയാൾ പിടിയിലായത്. പൊൻകുന്നം സ്റ്റേഷൻ എസ്.എച്ച്.ഒയായിരുന്ന വിജയരാഘവനാണ് കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി സ്‌പെഷ്യൽ പബ്ലിക് പ്രോസിക്യൂട്ടർ അഡ്വ. ബി.രാജേഷ് ഹാജരായി.