കുടിവെള്ള കച്ചവടക്കാരുടെ കൊയ്ത്ത്..... കുടിച്ച വെള്ളത്തിൽ വിശ്വസിക്കരുതേ...

കോട്ടയം : ചൂടിന് കാഠിന്യമേറിയതോടെ കുടിവെള്ളക്ഷാമം രൂക്ഷമായത് മുതലെടുത്ത് കുടിവെള്ളക്കച്ചവടക്കാരുടെ കൊയ്ത്ത് തുടങ്ങി. ശുദ്ധജലമെന്ന പേരിൽ പലരും എത്തിക്കുന്നത് പാറക്കുളത്തിലെ വെള്ളമാണ്. സർക്കാർ കുടിവെള്ള പദ്ധതികളുടെ പ്രയോജനം കിട്ടാതായതോടെ സാധാരണക്കാർ കുടിവെള്ളക്കച്ചവടക്കാരെ ആശ്രയിക്കാൻ നിർബന്ധിതരാവുകയാണ്. എന്നാൽ ഇവർ എത്തിക്കുന്ന വെള്ളത്തിന്റെ ഗുണമേന്മ ഉറപ്പാക്കാൻ സംവിധാനങ്ങളില്ലാത്തത് ആരോഗ്യ പ്രശ്‌നങ്ങൾക്ക് കാരണമാകുമെന്നാണ് ഭീതി. ദൂരം കൂടുന്നതിന് അനുസരിച്ച് വെള്ളത്തിന്റെ നിരക്കും കൂടും. മുൻപ് 400 രൂപയ്ക്ക് 4000 ലിറ്റർ ലഭിച്ചിരുന്ന പ്രദേശങ്ങളിൽ ഇപ്പോൾ 1000 രൂപ നൽകണം. മോട്ടോർ ഉപയോഗിച്ച് പമ്പ് ചെയ്യുന്നതിന് 50 രൂപ മുതൽ ഈടാക്കാറുണ്ട്. ആഴ്ചയിലൊരിക്കലെങ്കിലും കുടിവെള്ളം എടുക്കുന്ന ജലസ്രോതസ്സുകൾ ക്ലോറിനേഷൻ നടത്തി അണുവിമുക്തമാക്കണം. പലരും ഇത് ചെയ്യുന്നില്ല. വെള്ളം ശേഖരിക്കുന്ന സ്ഥലത്തുള്ള തദ്ദേശ സ്ഥാപനങ്ങൾക്കും വില്പനക്കാരുടെ മേൽ യാതൊരുവിധ നിയന്ത്രണവുമില്ലാത്ത സാഹചര്യമാണ്. നാട്ടകം, പാക്കിൽ, കീഴ്ക്കുന്ന്,സംക്രാന്തി, തൃക്കൊടിത്താനം, കറുകച്ചാൽ, നെടുംകുന്നം തുടങ്ങി നിരവധിയിടങ്ങളിലാണ് കുടിവെള്ളം കിട്ടാക്കനി.

ലക്ഷ്യം പണം മാത്രം, ഗുണമേന്മ ഇല്ലേയില്ല
ആരോഗ്യവകുപ്പിന്റെയും പഞ്ചായത്തുകളുടെയും അനുമതിയുണ്ടെങ്കിൽ മാത്രമേ കുടിവെള്ള വിതരണം നടത്താൻ കഴിയൂ. കുടിവെള്ളം എടുക്കുന്ന കിണർ, ജലസ്രോതസ് ആരോഗ്യ വകുപ്പ് അധികൃതർ പരിശോധിച്ച് ഗുണമേന്മ ഉറപ്പുവരുത്തണം. എന്നാൽ പലരും അനുമതി വാങ്ങാറില്ല. സ്വന്തമായി വാഹനവും വാട്ടർ ടാങ്കുമുള്ളവരെല്ലാം കുടിവെള്ളവുമായി ഇറങ്ങുന്ന കാഴ്ചയാണ്. പണം സമ്പാദിക്കുകയാണ് ലക്ഷ്യം. വിവിധ നിരക്കുകളാണ് ഈടാക്കുന്നത്. പിക്കപ്പ് വാനുകൾ, ഓട്ടോറിക്ഷകൾ, മിനി ലോറികൾ എന്നിവയിലാണ് ജലവിതരണം.

നിരക്ക് ഇങ്ങനെ
750 ലിറ്റർ : 250
1000 ലിറ്റർ : 300
4000 ലിറ്റർ : 1000